Սահմանազատումից հետո դժվար է լինելու ադրբեջանցիներին ասել՝ հետ գնացեք․ Սեյրան Օհանյան

Մեր մոտեցումները շատ հարցերի շուրջ տարբերվում են «Քաղաքացիական պայմանագիր» խմբակցության մոտեցումներից։ Այս մասին այսօր Ազգային ժողովում հայտարարեց  «Հայաստան» խմբակցության ղեկավար Սեյրան Օհանյանը:

«Մենք ապրում ենք խորհրդարանական երկրում, և գաղափարական բազմակարծությունը սահմանադրական նորմ է, մեր տեսակետները կարող են արտահայտվել շատ ավելի մեղմ, եթե իրադրությունը մեղմ է»,- նշեց Օհանյանը:

Անդրադառնալով «Քաղաքացիական պայմանագիր» կուսակցության պատգամավոր Վաղարշակ Հակոբյանի ելույթին, նա նշեց, որ խոսակցության տոնն այն չէր, և խնդրեց զուսպ խոսել. «Մենք էլ կարող ենք շատ բարձր տոնով խոսել»:

Նա նշեց, թե խոսվում է հանդուրժողականության մասին, բայց ինչպես հանդուրժողական լինել, երբ իրենց երկու գործընկերներ գտնվում են անազատության մեջ։

«Ինչպե՞ս կարող ենք մենք հանդուրժել այն իրավիճակը, երբ այն սպառնալիքները, որ կան Հայաստանի շուրջ, բավականին լուրջ են»,- նշեց պատգամավորը։

Նրա խոսքով՝ այն ռազմավարական կետերը, որտեղ ադրբեջանցիներն են եկել, հետագայում շատ դժվար է լինելու սահմանազատումից հետո ասել՝ հե՛տ գնացեք։

«Մենք առանց խաղաղության պայմանագրի, բանավոր կերպով, ասել ենք՝ էս դիրքերից հե՛տ գնացեք: Ինչո՞ւ նախկին ԱԺ-ն չի իրականացրել իր պարտավորությունները մեր սահմանների նկատմամբ, ու ովքե՞ր են մեղավոր, որ ադրբեջանցիները հայտնվել են մեր սահմանում»,- ասաց պաշտպանության նախկին նախարարը։

Մանրամասները՝ տեսանյութում: