Փաշինյանը ձգտում է ինչ-որ կերպ հետ մղել իրենից խնդիրները՝ տարբեր լուծումներ առաջարկելով․ Նավասարդյան. ՏԵՍԱՆՅՈՒԹ

«ՀԱՊԿ մոնիթորինգային առաքելության տեղակայումը հայ-ադրբեջանական սահմանի երկայնքով, ինչպես նաև ԵԱՀԿ Մինսկի խմբի համանախագահության կողմից մոնիտորինգի իրականացման հետ կապված առաջարկն ակտուալ չէ, ուստի պետք է հանել այդ կետերը և կենտրոնանալ ռուս զինվորականների՝ ՀՀ-ի և Ադրբեջանի սահմանի երկայնքով ներկայության վրա»,- «ՌԴ սահմանապահները հայ-ադրբեջանական սահմանին. Երևանի առաջարկի հետքերով» թեմայով առցանց քննարկման ժամանակ հայտարարեց Երևանի մամուլի ակումբի նախագահ Բորիս Նավասարդյանը:

Հիշեցնենք՝ ՀՀ վարչապետի պաշտոնակատար Նիկոլ Փաշինյանըերեկ  կառավարության նիստի ժամանակ հայտարարեց. «Կարծում եմ, որ Ադրբեջանի և մեր փոխադարձ մեղադրանքների իսկությունը պարզելու հարցում հնարավոր լուծումներից մեկը կարող է լինել ՀԱՊԿ մոնիթորինգային առաքելության տեղակայումը հայ-ադրբեջանական սահմանի երկայնքով, ինչը նախատեսված է ՀԱՊԿ-ի գործունեության իրավակարգավորումներով: ՀԱՊԿ-ի շրջանակներում նման առաքելություն իրականացնելու անհնարինության պայմաններում մեզ համար կարող են լինել միջազգային այլ ընդունելի ձեւաչափեր, ներառյալ՝ ԵԱՀԿ Մինսկի խմբի համանախագահությունը»:
Բորիս Նավասարդյանը կարծիք հայտնեց,, որ Փաշինյանի այս հայտարարությունն առանձնապես արձագանք չի ունենա:

Նա նաև ընդգծեց, որ Փաշինյանը ձգտում է ինչ-որ կերպ հետ մղել իրենից խնդիրները՝ տարբեր լուծումներ առաջարկելով:

«Այդ առաջարկությունը ֆորմալ բնույթ է կրում, քանի որ ՀԱՊԿ-ի կողմից դիտորդական առաքելության իրականացումը չի կարող արդյունավետ լինել, դա կլինի ինքն իրենով անիմաստ քայլ, բացի դրանից, կարծում եմ՝ ՀԱՊԿ անդամ երկրներն այդ առաջարկը չեն ընդունի»:

Մանրամասները՝ տեսանյութում: