24.04.2026 | 00:23
Սպերցյանի գոլն օգնել է «Կրասնոդարին» հաղթել «Սպարտակին»․ ՏԵՍԱՆՅՈՒԹ
Վազգեն Մանուկյանի գործով նիստը հետաձգվեց․ դատարանը հեռացավ խորհրդակցական սենյակ
Հասարակություն
20.07.2021 | 14:58
Երևան քաղաքի ընդհանուր իրավասության առաջին ատյանի դատարանի Ավանի նստավայրում այսօր մեկնարկեց ՀՀ նախկին վարչապետ Վազգեն Մանուկյանի գործով դատավարությունը։ Գործը քննվում է Վահե Միսակյանի վարույթում։
Նիստի սկզբում պաշտպան Արամ Վարդևանյանը միջնորդեց վերացնել Վազգեն Մանուկյանի նկատմամբ կիրառված խափանման միջոցը՝ ստորագրություն չհեռանալու մասին։ Միջնորդության հիմքում պաշտպանը նշեց, որ նախաքննության ողջ ընթացքում Մանուկյանը չի խուսափել գործի քննությունից և պատշաճորեն ներկայացել է նախաքննական մարմնին։
Մեղադրող դատախազ Ստեփանյանն առարկեց ներկայացված միջնորդությանը։ Ըստ նրա՝ դեռևս չեն վերացել առանց հարգելի պատճառով չներկայանալու և այլ ճանապարհով գործի քննությանը խոչընդոտելու հանգամանքները։
Լսելով կողմերին՝ դատարանը հեռացավ խորհրդակցական սենյակ՝ որոշում կայացնելու։ Այն կհրապարակվի 16։00-ին։
Հիշեցնենք, որ Մանուկյանին մեղադրանք է առաջադրվել ՀՀ քրեական օրենսգրքի 301 հոդվածով (իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերը)։
Վազգեն Մանուկյանն իրեն առաջադրված մեղադրանքը չի ընդունում, Քննչական կոմիտեում հրաժարվել է ցուցմունք տալ։ Ըստ նրա՝ իր հայտարարությունները Հայաստանի Սահմանադրությունը չեն խախտել։
Ռոզա Վարդանյան
