Ալիևը շարունակելու է սադրանքները, ամեն ինչ անելու է՝ Զանգեզուրից միջանցք պոկելու համար․ Թևան Պողոսյան. ՏԵՍԱՆՅՈՒԹ

Factor TV-ի հարցազրույցը Մարդկային զարգացման միջազգային կենտրոնի ղեկավար Թևան Պողոսյանի հետ

-Պարո՛ն Պողոսյան, նախ անվտանգային հարցերին անդրադառնանք։ Սահմանին Ադրբեջանի սադրանքները չեն նվազում։ Կրկին զոհ ունենք, այս անգամ՝ Նախիջևանի ուղղությամբ միջադեպի հետևանքով։ Երեկ երեկոյան էլ Շուշիից կրակահերթեր են արձակել, Արցախի ՄԻՊ-ը տեղեկացրեց։ Ի՞նչ նպատակ է հետապնդում Բաքուն և որքա՞ն հեռուն կարող են գնալ այս սադրանքները՝ ըստ Ձեզ։

-Ընդամենը երկու օր առաջ ունեցել ենք նոր սադրանքներ, երբ փորձել են դիրքերն առաջ բերել, գաղափարը հենց դրանում է, որովհետև մայիսի 12-ից այն վարքագիծը, որ գործող իշխանությունները ստանձնել են, որ Ադրբեջանը կարող է առանց որևէ դիմադրության, պատժի հանգիստ ներխուժել Հայաստանի Հանրապետության տարածք և տեղակայվել այնտեղ, որտեղ հարմար է։ Եվ եթե կարելի է Սյունիքում ու Գեղարքունիքում, ո՞վ է ասել, որ Նախիջևանի ուղղությամբ պետք է նույնը չանի։ Հենց դրա մասին էինք նախազգուշացնում անընդհատ, որ Արցախն է իրականում Հայաստանի անվտանգության երաշխավորը, Հայաստանն էլ՝ Արցախի։ Հայաստանն Արցախին դավաճանեց, չկարողացավ մինչև վերջ պահպանել հայրենիքի մեր այդ մասը, Արցախը հիմա թույլ վիճակում է, չի կարողանում որևէ կերպ իր վրա հարվածը վերցնել, Հայաստանը ստանում է այն, ինչ թշնամիները խոստանում են։

Նույն Ալիևի խոսքերը մեր լրատվականները երկու-երեք օր առաջ, զարմանք հայտնելով՝ Ալիևը նման բան է ասել, ինչպես կմեկնաբանեք․․․ բայց նույն Ալիևն ասում է՝ ես տասը տարի անընդմեջ հայտարարել եմ սրա մասին։ Դրանից առաջ էլ իր նախկիններն են ասել, որ «Զանգեզուրը համարում ենք մերը, Երևանն ենք համարում մերը, Սևանն ենք համարում մերը, Սևանի ափին թեյ ենք խմելու․․․»։ Իսկ մենք ինչ-որ անլրջության մեջ ապրում էինք։ Հունիսի 20-ին էլ որոշում կայացվեց, որ, երևի, ավելի լավ է թուրքի ու ադրբեջանցու հետ կամ իրենց լծի տակ ապրել, քան ինչ-որ չափով արժանապատվություն ունենալ, որ հայրենիք ունես և այդ հայրենիքին կարողանում ես տեր կանգնել։

Ադրբեջանը շարունակելու է սադրանքները, և Ալիևը հետ չի կանգնելու իր ասածներից։ Դա ստիպողական ճնշումների գործիքակազմի մի էլեմենտ է, որ հասնել այդ իրենց խոստումների ընդամենը մեկ կետին՝ ամեն ինչ անել, որ ունենան հիմնավորում՝ Զանգեզուրից միջանցք պոկելու։

-Ադրբեջանի նախագահը ոչ միայն ագրեսիվ հռետորաբանություն է օգտագործում, այլև Հայաստանին մեղադրում է խաղաղության չգնալու մեջ։ Ի՞նչ պետք է անի Հայաստանն ավելին։

-Ո՞ր Հայաստանը։ Իմ պատկերացմամբ՝ պետք է գաղափար ունենալ՝ արդյո՞ք Հայաստանում կա ընկալում, թե ինչն է հայրենիքը, ինչու են մեր նախնիները ժամանակին ձևավորել Հայաստանի Հանրապետություն, ինչու ենք սա համարում մեր տարածք, ինչ սխալ քայլեր ենք արել և հենց վաղվանից սկսենք ուղղել ու թույլ չտալ, որ Հայաստանը վերանա։

-Ստեղծված իրավիճակում միջազգային հանրությունն այլևս անելիք չունի՞։

-Ունի՝ իր շահերն առաջ տանել։ Իրենք իրենց շահերով են առաջնորդվելու, ինչո՞ւ պետք է որևէ մեկին մտահոգի հայկական կողմի շահերը։ Ունեն և շատ լավ անում են՝ իրենց երկրների շահերը տանում են առաջ։

Հարցազրույցն ամբողջությամբ՝ տեսանյութում։

Թամարա Հակոբյան