Քաղաքականություն
15.07.2021 | 23:02
Աֆղանստանում «Թալիբան» շարժման սպառնալիքները Թուրքիայի դեմ միայն խորհրդանշական բնույթ ունեն՝ ցույց տալու համար երկրում իրենց գերիշխանությունը։ Այս մասին գրում է «Ահվալ» գործակալությունը՝ ներկայացնելով BBC-ի թուրքական ծառայության՝ թուրքական ու ամերիկյան անանուն պաշտոնյաների վկայակոչած հրապարակումը։
Ըստ լրատվամիջոցի աղբյուրների՝ թալիբների սպառնալիքները պետք է դիտարկել ավելի շատ որպես կեցվածք, քան իրական սպառնալիք, որ գրոհայինները կթիրախավորեն թուրք զինվորներին Քաբուլի միջազգային օդանավակայանում, որոնք, հնարավոր է, կտեղակայվեն այնտեղ սեպտեմբերին՝ ամերիկյան ուժերի դուրսբերումից հետո։
Թուրքիայում անվտանգության ոլորտի անանուն պաշտոնյան ասել է, որ «Թալիբանն» ԱՄՆ-ի ուժերը դիտում է որպես օտարերկրյա զավթիչների, բայց դա Թուրքիային չի առնչվում։ Աղբյուրի պնդմամբ՝ «Թալիբան»-ը հասկանում է, որ Անկարան երկրում գաղտնի օրակարգ չունի։
«Դրանք խորհրդանշական հայտարարություններ են։ Այս ուղերձն ուղղված է միջազգային հանրությանը։ Հետևաբար, մենք չենք կարծում, որ ագրեսիվ վերաբերմունք կլինի Թուրքիայի նկատմամբ»,- ասել է աղբյուրը։
Երեքշաբթի «Թալիբան»-ը կրկնել էր իր պահանջը, որ Թուրքիան հետևի մյուս միջազգային ուժերի՝ Աֆղանստանից զորքերի դուրսբերմանը, երբ ԱՄՆ-ը ավարտի սեպտեմբերին երկրից իր զորակազմի դուրսբերման գործընթացը։ Հակառակ դեպքում, ըստ թալիբների, ապագայում նրանք նույնպես կարող են թիրախ դառնալ։
Թուրքիայի առաջարկը՝ շարունակելու ապահովել Քաբուլի միջազգային օդանավակայանի անվտանգությունը, ողջունել են ԱՄՆ-ն և Քաբուլի պաշտոնյաները։ Այնուամենայնիվ, առաքելությունը կսահմանափակվի օդանավակայանի գործունակության ապահովմամբ և չի դառնա ռազմական առաքելություն՝ նման Թուրքիայի միջամտություններին Սիրիայում կամ Լիբիայում:
Էմմա Չոբանյան
