Գնումների մասին տեղեկությունների սահմանափակումները ժողովրդավարությանը դեմ չեն. Հայկ Չոբանյան. ՏԵՍԱՆՅՈՒԹ

ՀՀ բարձր տեխնոլոգիական արդյունաբերության նախարարի պաշտոնակատար Հայկ Չոբանյանը Կառավարությունում լրագրողների հետ ճեպազրույցում նշեց, որ համաձայն չէ այն կարծիքի հետ, թե հանրային քննարկման դրված օրինագիծը, որով  նախատեսվում է չհրապարակել պետական աշխատակիցների գործուղումների նպատակի, քննարկված թեմաների, հանդիպումների, ելույթների, ընդունված որոշումների մասին տեղեկությունները, ոտնահարում է Հայաստանում խոսքի ազատությունը:

Նախարարի պաշտոնակատարը հայտնեց, որ շուտով նախարարությունում այդ հարցերով հանրային քննարկումներ տեղի կունենան։ «Բոլորին կլսենք և կտանք ամենառացիոնալ լուծումը՝ մեր երկրի և ժողովրդի համար»,- նշեց Չոբանյանը։

Նրա կարծիքով՝ գնումների մասին տեղեկությունների սահմանափակումները ժողովրդավարությանը դեմ չեն, այլ հակառակը։

Հիշեցնենք, որ e-draft.am կայքում քննարկման են դրվել ՀՀ վարչապետի 2018 թ․ սեպտեմբերի 19-ի թիվ 1230-Ն որոշման, ՀՀ կառավարության 2012 թ․ օգոստոսի 30-ի թիվ 1104-Ն և 2016 թ․ սեպտեմբերի 22-ի թիվ 982-Ն որոշումների մեջ փոփոխություններ կատարելու մասին նախագծերը։ Դրանցից առաջինով նախատեսվում է e-gov.am հարթակում չհրապարակել պետական աշխատակիցների գործուղումների նպատակի, քննարկված թեմաների, հանդիպումների, ելույթների, ընդունված որոշումների մասին տեղեկությունները։ Երկրորդով՝ չներկայացնել մեկ անձից իրականացվող գնումների մասին տեղեկությունները, արտադրական վտանգավոր օբյեկտների ռեեստրը, օգտակար հանածոների և ստորերկրյա հանքային ջրերի արդյունահանման ու երկրաբանական ուսումնասիրության նպատակով ընդերքօգտագործման իրավունք ունեցող ընկերությունների տվյալները: Բացի այդ, առաջարկվում է gov.travel.am կայքից հեռացնել ավիափոխադրողների, չվերթների, դրանց արժեքի, ամրագրման կոդերի, ուղևորների քանակի վերաբերյալ տեղեկությունները: Այս փաստաթղթերը մշակել է ՀՀ բարձր տեխնոլոգիական արդյունաբերության նախարարությունը՝ համագործակցելով ՀՀ ազգային անվտանգության ծառայության հետ։