14.04.2026 | 16:15
Իտալիայի վարչապետը հայտարարել է Իսրայելի հետ պաշտպանական համաձայնագրի դադարեցման մասին
ԵՐԵՎԱՆԻ ԺԱՄԱՆԱԿՈՎ․ Շունչ քաշելու հնարավորություն չի լինելու, որովհետև ո´չ պատերազմը, ո´չ ընտրությունները հետևում չեն․ Դավիթ Մաթևոսյան․ ՏԵՍԱՆՅՈՒԹ
Քաղաքականություն
03.07.2021 | 17:02
«Մեր երկիրը չի ունենալու շունչ քաշելու հնարավորություն, որովհետև ո՛չ պատերազմը, ո՛չ ընտրությունները հետևում չեն, մեզ զուգահեռ գնում են, մեզ հետ են։ Մենք դրանք չենք հաղթահարել, ընդամենը փորձել ենք անել դա, հիմնականում՝ անհաջող ելքով»,- Factor TV-ի հետ զրույցում նման տեսակետ է հայտնում ռեժիսոր, «Հրանտ Մաթևոսյան» հիմնադրամի տնօրեն Դավիթ Մաթևոսյանը։
Նա անդրադառնում է ներքաղաքական կյանքին՝ նշելով՝ ներկայիս իշխանությունը հնարավորություն ստեղծեց, որ նախկինները դառնան ընդդիմություն, մտնեն խորհրդարան և լինեն միակ ընդդիմախոսը։
«Ինքը՝ Փաշինյանը, մեծապես նպաստել է Քոչարյանի ընդդիմական թևի՝ Հայաստանում վերածնվելուն և ոտքի կանգնելուն՝ որպես բացասական կերպար, որի ֆոնին «սպիտակները» ավելի «սպիտակ են» երևում»,- ասում է Դավիթ Մաթևոսյանը։
Հարցին՝ ո՞ր դեպքում կարող է նոր խորհրդարանում առողջ բանավեճ ծավալվել, մեր զրուցակիցը պատասխանում է․ «Միայն արտաքին վտանգի սաստկացման, կենաց-մահու մարտահրավերի դեպքում է հնարավոր նման բան։ Այդ ժամանակ, գուցե, քաղաքական ուժերը կառուցողականության գնան, ինչպես պատերազմի ժամանակ որոշ սակավ դեպքերում եղավ»։
Դավիթ Մաթևոսյանը խոսում է նաև այն մասին, թե ինչու է ձգձգվում «Հրանտ Մաթևոսյան կենտրոն-թանգարանի» վերջնական կառուցումը․ «Կենտրոնը վերջնական տեսքի բերելու հարցում կա հանրության աջակցությունը, մասնավորապես՝ միջին խավի կողմից։ Մեկենասներից առայժմ արձագանք չկա, բայց շարունակում ենք աշխատել միջազգային հիմնադրամների հետ»։
Նշենք, որ Դավիթ Մաթևոսյանը հրաժարվել էր կառավարական մարմիննների հետ «Հրանտ Մաթևոսյան կենտրոն-թանգարանի» լրակառուցման, կահավորման և գործարկման՝ երկար ժամանակ անցկացված բանակցություններից՝ նշելով, որ այս խնդիրները հիմնադրամը կփորձի լուծել ոչ կառավարական հաստատությունների, բարերարների և պարզապես հանրության աջակցության շնորհիվ:
Հարցազրույցն ամբողջությամբ՝ տեսանյութում։
Աննա Բաբաջանյան
