Դա սուտ է․ թող մի փաստ ներկայացնեն, որ ՔՊ-ն ընտրության ժամանակ ուղղորդել է զինվորականներին. Խաչատրյան. ՏԵՍԱՆՅՈՒԹ

«Իշխանությունը երբևէ վենդետա չի արել, այդ բառը չեմ ընդունում, բայց այս 2-3 տարիների ընթացքում պետք է մի շարք գործողություններ աներ, որը չի արել, ինչն էլ հանգեցրել է հենց ժողովրդի դժգոհությանը:  Մենք ժողովրդի պահանջով ենք առաջնորդվում: Այն, որ պետք է կադրային քաղաքակնության մեջ լուրջ փոփոխություններ լինեն, զտումներ լինեն բոլոր համակարգերում, դա միանշանակ է, դա հանրության պահանջն է և իրականացվելու է»,- այս մասին այսօր՝ հուլիսի 1-ին, լրագրողների հետ զրույցում ասաց  «Իմ քայլը» խմբակցության պատգամավոր Արմեն Խաչատրյանը:

«Պատերազմից հետո իրողությունը փոխվեց. ընդդիմությունը մի այնպիսի պատկեր ստեղծեց, թե ՀՀ-ում բնակչությունը չի ընդունում իշխանությանը, այդ թվում նաև Սյունիքում, ընդդիմադիր թևը այս ֆարսի համար մեծ գումարներ ծախսեց: Այս ամենից ելնելով՝ միանշանակ իշխանությունը պետք է գնար ընտրությունների՝ հասկանալու, թե կեղծը որն է, ճշմարտությունը որն է: Այդպիսի միֆեր տարածողները ջախջախիչ պարտություն կրեցին»,- նշեց իմքայլական պատգամավորը:

Անդրադառնալով մամուլում տեղ գտած լուրերին, առ այն, որ Սյունիքում,  մասնավորապես Շուռնուխում զինվորականները ուղղորդվել են ընտրություն կատարելիս, պատգամավորը  նշեց. «Դա կատարյալ սուտ է… Գորիսում, որտեղ անգամ մեկ զինվորական չի մասնակցել, ՔՊ-ն հաղթանակ է տարել՝ 2-3 անգամ ավելի ձայներով, քան ասենք «Հայաստան» դաշինքը: Եթե մեկ զինվորական ուղղորդվեր, այդ մասին հանրությունը անպայման կիմանար: Բայց կան դեպքեր, երբ զինվորականն ուղղորդվել է «Հայաստան» դաշնքի կողմից… Եթե ուղղորդվել են մեր կողմից, թող մի փաստ ներկայացնեն»,- նշեց Արմեն Խաչատրյանը:

Մանրամասները՝ տեսանյութում: