Ո՞վ է ավելի շատ փող ծախսել քարոզարշավի ընթացքում․ ԿԲ-ն տվյալներ է ներկայացրել

Հունիսի 20-ին տեղի ունեցած արտահերթ խորհրդարանական ընտրություններին մասնակցող ուժերը քարոզարշավի ընթացքում միլիոնավոր դրամներ են ծախսել։

Կենտրոնական բանկը ներկայացրել է ընտրություններին մասնակցող ուժերի նախընտրական հիմնադրամների հաշիվների մուտքերը ու ծախսված գումարները հունիսի 19-ի դրությամբ։

Այսպես․ քարոզչության վրա ամենաշատ գումարը ծախսել է «Քաղաքացիական պայմանագիր» կուսակցությունը։ Նախընտրական հիմնադրամի հաշվին մուտքագրվել է շուրջ 477 մլն դրամ, որից ծախսվել է շուրջ 475 մլն դրամը։

2-րդ տեղում «Հայաստան» դաշինքն է՝ շուրջ 331 մլն դրամ մուտքերով։ Այս գումարից ծախսվել է 330 մլն 856 հազար դրամ։

«Պատիվ ունեմ»  դաշինքի նախընտրական հիմնադրամի հաշվին մուտքագրվել է շուրջ 274 մլն դրամ, որից ծախսվել է շուրջ 272 մլն դրամը։

Նշենք, որ այս 3 ուժերը, որոնք ամենաշատն են գումար ծախսել նախընտրական քարոզչության վրա, անցել են Ազգային ժողով։

Ծախսված գումարների մեծությամբ նրանց հաջորդում է «Բարգավաճ Հայաստան» կուսակցությունը։ Կուսակցության նախընտրական հաշվին մուտքագրվել է շուրջ 89 մլն դրամ, որից շախսվել է շուրջ 88 մլն դրամը։

«Լուսավոր Հայաստան» կուսակցության նախընտրական հիմնադրամի հաշվի մուտքերը կազմել են շուրջ 88 մլն դրամ, որն ամբողջությամբ ծախսվել է։

Նրան հաջորդում է «Հայ ազգային կոնգրես» կուսակցությունը՝ 57 մլն դրամ մուտքերով, որից մնացել է 636 հազար դրամը։

«Մեր տունը Հայաստանն է» կուսակցությունը ստացած 53,7 մլն-ից ծախսել է 53,4 մլն դրամը։

«Հայաստանի դեմոկրատական կուսակցությունը» նախընտրական հիմնադրամի հաշվին ստացել է 30,7 մլն դրամ, որը գրեթե ամբողջությամբ ծախսվել է։

«Շիրինյան-Բաբաջանյան ժողովրդավարների դաշինքը» ստացել է 27,7 մլն դրամ, որը գրեթե ամբողջությամբ ծախսվել է։

«5165 ազգային պահպանողական շարժում» կուսակցությունը ստացել է 23,5 մլն դրամ, որն ամբողջությամբ ծախսվել է։

Կենտրոնական բանկից  Factor.am-ին տեղեկացրին, որ սրանք վերջնական թվերը չեն և առաջիկայում կհրապարակվեն ընտրություններին մասնակցած ուժերի ստացած գումարների ու ծախսերի վերաբերյալ տեղեկատվություն հունիսի 20-ի դրությամբ։

Նշենք, որ նախընտրական հիմնադրամներին ստացված գումարների մնացորդները ըստ սահմանված կարգի փոխանցվելու են Պետական բյուջե։

Անժելա Պողոսյան