ՄԻԵԴ-ն ընդդեմ Հայաստանի․ ՀՔԱ Վանաձորի գրասենյակի ուսումնասիրության արդյունքները

2002 թվականի ապրիլից մինչև 2021 թվականի հունիսի 1-ն ընկած ժամանակահատվածում ՄԻԵԴ-ն ընդդեմ Հայաստանի 141 վճիռ է կայացրել։ Հելսինկյան քաղաքացիական ասամբլեայի Վանաձորի (ՀՔԱՎ) գրասենյակը ներկայացրել է Մարդու իրավունքների և հիմնարար ազատությունների մասին Եվրոպական կոնվենցիայի վավերացումից մինչև 2021 թվականը Մարդու իրավունքների եվրոպական դատարանի (ՄԻԵԴ) կողմից Հայաստանի Հանրապետության դեմ կայացրած վճիռների ուսումնասիրության արդյունքները։

Դրանց համաձայն՝ ՄԻԵԴ-ը նշված ժամանակահատվածում 141 վճիռ է կայացրել ընդդեմ Հայաստանի, որից 131 վճիռներով արձանագրվել են մարդու իրավունքի խախտումներ, 5 վճիռներ էլ վերաբերում են փոխհատուցման հարցերին, ևս 5 վճիռներում էլ ՄԻԵԴ-ը խախտում չի արձանագրել։

Տվյալներ են հրապարակվել նաև մինչև 2008 թվականի ապրիլ ամիսը տեղի ունեցած մարդու իրավունքների խախտումների դեպքերով, որտեղ ՄԻԵԴ-ը կայացրել է խախտում արձանագրող թվով 99 վճիռներ, որոնց մեծ մասը վերաբերում է ազատության և անձնական անձեռնմխելիության իրավունք խախտմանը (23 վճիռ), 18 վճռով էլ արձանագրվել է սեփականության պաշտպանության խախտում։

2008 թվականի մայիսից մինչև 2012 թվականը ներառյալ՝ մարդու իրավունքների խախտումների տեղի ունեցած դեպքերով ՄԻԵԴ-ը կայացրել է խախտում արձանագրող թվով 31 վճիռներ, որից 15 վճիռ վերաբերում է սեփականության պաշտպանության խախտմանը, ևս 12 վճիռ էլ կայացվել է արդար դատաքննության իրավունքի խախտման վերաբերյալ։

Եվս 1 վճիռ՝ արդար դատաքննության իրավունքի խախտման վերաբերյալ, ՄԻԵԴ-ը կայացրել է 2016 թվականին մարդու իրավունքների խախտումներով տեղի ունեցած դեպքի հիման վրա։

Մերի Մանուկյան