ՆԱՏՕ-ն պետք է Թուրքիային ասի, որ իր անդամակցությունն այլևս ողջունելի չէ․ Bloomberg

Թուրքիային պետք է ասել, որ այն այլևս չի ողջունվում որպես ՆԱՏՕ-ի անդամ, քանի որ Արևմուտքի համբերությունը նախագահ Ռեջեփ Թայիփ Էրդողանի կառավարության նկատմամբ արդեն հատվում է։ Այս մասին գրել է Bloomberg-ը, հաղորդում է «Ահվալ» գործակալությունը։

Լրատվամիջոցը նշում է որ Թուրքիան ցանկանում է մնալ Արևմուտքի ռազմական պաշտպանության ներքո և ցանկանում է մասնակցել տնտեսական ասոցիացիաներին, մինչ Էրդողանը միավորում է երկիրը Չինաստանի, Ռուսաստանի, Իրանի հետ․ տերություններ, որոնք բացահայտ թշնամական վերաբերմունք ունեն Արևմուտքի դեմ։

«Արևմուտքը պետք է արձագանքի ՝ցույց տալով, որ թուրքական հանդգնության նկատմամբ հանդուրժողականությունն ավարտված է։ Լավագույն ձևը դա անելու՝ ՆԱՏՕ-ն է»,- ասվում է հրապարակման մեջ։

Թուրքիան մտերիմ կապեր ունի Ռուսաստանի հետ՝ վերջին 5 տարիներին Արևմուտքի հետ հարաբերությունների վատթարացման ֆոնին։ Թուրքիան գնել է ռուսական S-400 պաշտպանական համակարգեր՝ անտեսելով ՆԱՏՕ-ի ու ԱՄՆ-ի նախազգուշացումները, որ դրանք սպառնում են դաշինքի տեխնոլոգիաների անվտանգությանը։

Բացի այդ, Թուրքիան նաև հարձակվել է Իրաքում քրդական խմբավորումների վրա, որոնք ՆԱՏՕ-ի դաշնակիցներն են ԻԼԻՊ-ի դեմ պայքարում, ներգրավվել  է Հունաստանի ու Կիպրոսի հետ տարածքային խնդիրների մեջ, դիվանագիտական առճակատման մեջ մտել Ֆրանսիայի հետ Լիբիայի պատճառով։ ՆԱՏՕ-ն նաև իր մտահոգություններն է հայտնել Թուրքիայում մարդու իրավունքների վիճակի վատթարացման կապակցությամբ, իսկ դաշինքին անդամակցությունը պահանջում է ժողովրդավարական սկզբունքների պահպանում:

Լրատվամիջոցը գրում է, որ ըստ ՆԱՏՕ-ի կանոնադրության՝ անդամ երկրները չեն կարող հեռացվել դաշինքից, բայց ձևեր կան՝ ասելու Թուրքիային, որ նա այլևս պետք չէ։

«Լավագույն սկիզբը կլինի թուրքական հողից դաշինքի ներկայությունը կրճատելը՝ հանելով միջուկային զենքն ու այլ ռազմավարական միջոցները»,- ասվում է հրապարակման մեջ։

Դաշինքը կարող է նաև Թուրքիայի դեմ կիրառել պատժամիջոցներ, ինչպիսիք են զենքի վաճառքի կասեցումը և տնտեսական պատժամիջոցները:

Ըստ լրատվամիջոցի՝ Եվրոպական Միությունը ևս պետք է հաստատի, որ մտադիր չէ վերականգնել Թուրքիայի՝ կառույցին անդամակցության շուրջ բանակցությունները։

Նշենք, որ այսօր Բրյուսելում տեղի է ունենում ՆԱՏՕ-ի գագաթնաժողովը, որին մասնակցում են անդամ պետությունների ղեկավարները։

Էմմա Չոբանյան