ԱԺ «Ծառուկյան» խմբակցությունը Արմեն Սարգսյանի թեկնածությանը կողմ կքվեարկի

Գագիկ Ծառուկյանի գլխավորած ԱԺ «Ծառուկյան» խմբակցությունը չորրորդ նախագահի ընտրությունների ժամանակ կողմ կքվեարկի Հանրապետականի առաջադրած թեկնածու Արմեն Սարգսյանի թեկնածությանը:  Որոշումը կայացվել է երեկ՝ խմբակցության պատգամավորների հետ հանդիպումից հետո:

«Ճանաչում եմ Արմեն Սարգսյանին, նրա մոտեցումը, նրա տեսակետը, նրա պատրաստակամությունը: Լևոն Տեր-Պետրոսյանի օրոք, որը իրեն հրավիրել է՝ իմանալով իր գրագիտությունը, իր պատրաստակամությունը, որ նա օգտակար լինի, և եղել է մեր Հայաստանի Հանրապետության վարչապետը: Բոլորն էլ լսել են, նա բացի պատգամավորներից, քաղաքական կառույցներից, հասարակական, տնտեսական, կրթական, գիտական բոլորի հետ հանդիպել է և բոլորին էլ ներկայացնելով, որ ինքը պետք է արտագաղթը դադարեցնի, ներգաղթ սկսի, վստահություն լինի, և մեծ ներդրումներ բերի, որը դա մարդու անձի շուրջ պետք է ձևավորվի: Ու այսօր այն է ասում, ինչ որ դա մենք բոլորս միասին, մեր ասածն է, մեր ցանկությունն է, մեր նպատակն է, որ, այո՛, արտագաղթը դադարեցվի, ներգաղթ լինի, մարդիկ հետ վերադառնան և կարողանան, վստահություն լինի, որ ներդրումներ լինեն: Իր տեսակետն ու մոտեցումը սա է, որը մենք երկրի համար, ասենք թե, ցանկացող, կամեցող մարդիկ ենք, ուրեմն՝ կողմնակից են»,- հանդիպմանը նշել է դաշինքի առաջնորդը:

Գագիկ Ծառուկյանը նաև հույս է հայտնել, որ Արմեն Սարգսյանն իր անունն ու հեղինակությունը կպահպանի, ավելին՝ կկրկնապատկի և կեռապատկի:

Հիշեցնենք՝ չորրորդ նախագահի ընտրությունը տեղի կունենա մարտի 2-ին:

Շողիկ Գալստյան