Ավինյանը մակագրել է ԱԳ նախարարի երեք տեղակալի ազատման դիմումները․ մեկ փոխնախարար շարունակում է պաշտոնավարել

Հայաստանի վարչապետի պարտականությունները կատարող Տիգրան Ավինյանը մակագրել է ՀՀ ԱԳ նախարարի երեք տեղակալների ազատման դիմումները: Տեղեկությունը Factor.am-ի հետ զրույցում հայտնեցին Ավինյանի գրասենյակից:

Նախարարի տեղակալների պաշտոններից ազատվել են Արտակ Ապիտոնյանը, Ավետ Ադոնցը և Գագիկ Ղալաչյանը, իսկ Արմեն Ղևոնդյանը շարունակում է աշխատել փոխնախարարի պաշտոնում:

Նշենք, որ պաշտոնից ազատման դիմումներ էին ներկայացրել նախարարի չորս տեղակալները։ Ինչո՞ւ Ղևոնդյանը պաշտոնանկ չի արվել․ Ավինյանի գրասենյակից միայն նշեցին, որ նա շարունակում է պաշտոնավարել: Հարցին՝ դիմումը հե՞տ է վերցրել, փոխվարչապետի գրասենյակից պատասխանեցին, որ տեղյակ չեն:

Հիշեցնենք, որ արդեն տասը օր է՝ Հայաստանը ԱԳ նախարար չունի: Արա Այվազյանը մայիսի 27-ից հրաժարականի դիմում էր ներկայացրել և ազատվել աշխատանքից: Նրա հրաժարականի պատճառները դեռ հայտնի չեն: Այվազյանն ԱԳՆ աշխատակազմի հետ հրաժեշտի հանդիպմանը հայտարարել էր․ «ԱԳՆ-ն չի կարող համաձայնություն տալ գաղափարների, որոնք մեր պետական շահի դեմ են»։

Թե ինչի մասին է խոսքը՝ Արա Այվազյանը չի մեկնաբանել: Նկատենք, սակայն, որ Այվազյանն աշխատանքից հեռանալու մասին հայտնեց մայիսի 27-ին տեղի ունեցած Անվտանգության խորհրդի նիստից հետո, որտեղ Նիկոլ Փաշինյանը հայտարարել էր, որ հայ-ադրբեջանական սահմանին առկա լարվածությունը հաղթահարելու համար պետք է երկու կողմերի զորքերը հետ քաշել և այնտեղ տեղակայել Ռուսաստանի կամ ԵԱՀԿ Մինսկի խմբի համանախագահության որևէ պետության դիտորդների: ԱԺ «Իմ քայլը» խմբակցության ղեկավար Լիլիթ Մակունցը Factor.am-ի հարցին ի պատասխան նշել էր, որ Փաշինյանն իր այս նախաձեռնության մասին նախապես տեղեկացրել է Արա Այվազյանին, իսկ վերջինը որևէ առարկություն չի ներկայացրել:

Նարեկ Կիրակոսյան