ԵՐԵՎԱՆԻ ԺԱՄԱՆԱԿՈՎ․ Կան հավերժական կոալիցիոներներ, որոնք սպասում են` մեկի պոչից կպչեն ու պորտֆելներ ստանան. Վահան Արծրունի․ ՏԵՍԱՆՅՈՒԹ

«Դիակների ոչ պատշաճ պահպանումը ոչ միայն նեղ բժշկական էթիկայի, այլև հասարակական և հանրային բարոյաբանության խնդիր է, որն այս վերջին երեք տարվա ընթացքում անտեսված է եղել և հասել է կուլմինացիայի»,- Factor.am-ի հետ զրույցում նման տեսակետ է հայտնում կոմպոզիտոր, երգիչ Վահան Արծրունին` անդրադառնալով Դատաբժշկական կենտրոնի Աբովյանի մասնաճյուղում արձանագրված դիակների և մասունքների ոչ պատշաճ պահպանման փաստին:

Նրա խոսքով՝ դա պարզ, մարդկային, հումանիստական  հասկացություններից  դուրս երևույթ է. «Երբ համընդհանուր դեստրուկտիվ գործելաոճով մարդիկ գալիս են իշխանության, հասարակական մակարդակում տեսնում ենք դրա արտահայտությունը. բարոյալքում՝ բոլոր հնարավոր չափանիշներով»:

Վահան Արծրունու համոզմամբ՝ իշխանության գալու համար հիմա Հայաստանում իդեալական մթնոլորտ է։

«Կարող ես լուրջ գումարներ ներդնելով` թոզ փչել ժողովրդի աչքերին և գալ իշխանության: Կարդալով կուսակցությունների, դաշինքների նախընտրական ծրագրերը` զարմանում եմ. եթե այդ բարեփումները ձեր մտքին կար, ինչու՞ դրանք չէիք իրականացնում, երբ երկրի ղեկին էիք»,- ասում է նա։

Կոմպոզիտորը շեշտում է՝ մարդիկ, որոնք պաշտոնական դիրքը չարաշահել են հարստանալով` նորից իշխանության գալու հայտ են ներկայացնում. «Հանրությունը պետք է ինքն իրեն հարցնի. «Ի՞նչ չեմ տեսել այս մարդուց, որ հիմա պետք է տեսնեմ»: Բավական է թարմացնել հիշողությունը, և ամեն բան տեղը կընկնի»:

Մեր զրուցակցի կարծիքով՝ հարկավոր է առանձին ուշադրություն դարձնել առաջադրված քաղաքական ուժերի թիմերին. «Կան հավերժական կոալիցիոներներ, ընդ որում՝ պատմական հսկայական փորձ ունեցող կուսակցությունների շրջանում, որոնք սպասում են հարմար պահի, որ մեկի պոչից կպչեն ու պորտֆելներ ստանան»:

Հարցազրույցն ամբողջությամբ՝ տեսանյութում։

Աննա Բաբաջանյան