16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Պառավաքարի դպրոցում 44-օրյա պատերազմում զոհված հերոսների անուններով հրաձգարան և դասասենյակներ են անվանակոչվել
Հասարակություն
22.05.2021 | 19:02
Պառավաքարի միջնակարգ դպրոցում այսօր 44-օրյա պատերազմի ժամանակ անմահացած հերոսների՝ Հենզել Բաղդասարյանի, Կարեն Մարգարյանի, Արմեն Բրուտյանի, Սոս Սարգսյանի անուններով հրաձգարան և դասասենյակներ են անվանակոչվել: Այս մասին տեղեկացնում է Բերդի համայնքապետարանը։
Դասասենյակների անվանակոչման արարողությանը ներկա են եղել Բերդի համայնքապետարանի աշխատակազմի քարտուղար Հասմիկ Մելիքյանը, Պառավաքար գյուղի վարչական ղեկավար Ռոլանդ Մարգարյանը, Տավուշի թեմի առաջնորդ Բագրատ Եպիսկոպոս Գալստանյանը, Բերդի և տարածաշրջանի հոգևոր հովիվ Տեր Արամ քահանա Միրզոյանը, հերոսների ծնողները, հարազատները:
«Բերդ համայնքում մեր առաջին զոհը եղել է Կարեն Մարգարյանը` Պառավաքարից, վերջինը հրաժետ ենք տվել մեր Հենզել Բաղդասարյանին` կրկին Պառավաքարից: Մենք տեսել ենք տառապանքը, ապրումը, ցավը նաև Սոսի և Արմենի ընտանիքներում: Եվ այսպես ամեն օր, ամեն ժամ, ամեն րոպե… սակայն այսօր մեր տղաների լույս հայացքների ներքո ուզում եմ դիմել բոլորիդ պատերազմի ժամանակ նահատակված Վաչագան Մանուկյանի հոր` Խաչիկ Մանուկյանի խոսքերով, որ ասել է որդուն ճանապարհելիս. «Մենք իրավունք չունենք հերոսապատումը ողբերգության վերածելու»: Այո, մենք իրավունք չունենք: Մեր սիրելի եղբայրներն ու զավակները մեզ այդ իրավունքը չեն տվել: Մենք իրավունք չունենք նրանց սպանելու: … Մեր խոնարհումը բոլորիդ, մեր գնահատանքը Պառավաքարի դպրոցին, որտեղ ծնվել են մեր հերոսները…»,-նշել է Տավուշի թեմի առաջնորդ Բագրատ Եպիսկոպոս Գալստանյանը:
Այսօր Պառավաքարի մշակույթի տանը կայացել է նաև հուշ-ցերեկույթ՝ նվիրված պառավաքարցի անմահ հերոսների հիշատակին:
Միաժամանակ, ՀՀ նախագահի հրամանագրով՝ հայրենիքի պաշտպանության գործում ներդրած ավանդի, մարտական գործողությունների ընթացքում ցուցաբերած խիզախության և անմնացորդ նվիրումի համար պայմանագրային զինծառայող, կրտսեր սերժանտ Հենզել Բաղդասարյանը հետմահու պարգևատրվել է «Հայրենիքին մատուցած ծառայությունների համար» 2-րդ աստիճանի մեդալով: Մեդալն այսօր հանձնվել է Հենզել Բաղդասարյանի հարազատներին:
