10.04.2026 | 20:20
Դատարանը վերացրել է Գարեգին Բ-ի նկատմամբ կիրառված խափանման միջոցը. փաստաբան
Փորձի փոխանակում՝ ուղղված կենդանիների համարակալման համակարգի ներդրմանը
Տնտեսություն
20.02.2018 | 19:26
ՀՀ ԳՆ սննդամթերքի անվտանգության պետական ծառայության պետ Իշխան Կարապետյանը փետրվարի 20-ին ընդունել է ՄԱԿ-ի Պարենի և գյուղատնտեսության տարածաշրջանային կազմակերպության (FAO) միջազգային փորձագետ Կուտիմ Մերսինիին, Վրաստանի փորձագետներ Ռեվազ Սենաձեին և Ալեքսանդր Կաշաիշվիլիին: Այս մասին տեղեկացնում է ՍԱՊԾ լրատվական ծառայությունը:
Հանդիպմանը ներկա էին պատասխանատու պաշտոնյաներ գյուղատնտեսության նախարարությունից և Ծառայությունից:
Պարենի և գյուղատնտեսության կազմակերպությունն իրականացնում է գյուղատնտեսական կենդանիների նույնականացման և համարակալման համակարգի ներդրմանն ուղղված տարածաշրջանային ծրագիր, որի շրջանակներում Վրաստանում որոշակի միջոցառումներ են արվել: Սննդամթերքի անվտանգության պետական ծառայության կողմից, «Ագրոբիզնեսի և գյուղի զարգացման կենտրոն» (CARD) հիմնադրամի հետ և միջազգային այլ կառույցների աջակցությամբ, Հայաստանում նույնպես ծրագիրն արդեն մշակվել է: Այս համատեքստում հայ և վրացի գործընկերները տեղեկատվություն են փոխանակել երկու երկրներում կենդանիների համարակալման նպատակով իրականացվող ընթացիկ աշխատանքների և նախատեսվող միջոցառումների վերաբերյալ: Նաև փաստել են, որ փորձի փոխանակումն այս ոլորտում կարևոր նախադրյալ կլինի կենդանիների համարակալման ներդաշնակ և կենսունակ համակարգեր ունենալու հարցում՝ հատկապես միմյանց սահմանակից երկրներում գյուղատնտեսական կենդանիների հնարավոր տեղաշարժի պարագայում:
ՍԱՊԾ պետ Իշխան Կարապետյանը ներկայացրել է Ծառայության նախաձեռնությամբ մեկնարկած այն բոլոր միջոցառումներն ու ծրագրերը, որոնք կբերեն անասնաբուժության ոլորտում համալիր փոփոխությունների՝ անցում պարտադիր սպանդանոցային մորթի, համայնքային անասնաբույժների կարողությունների զարգացում, մսամթերքի դասակարգում և ռեյթինգավորում, սպանդանոցային ծագման մթերքն ուղեկցող փաստաթղթերի էլեկտրոնային համակարգի ներդրում: Նա ընդգծել է, որ կենդանիների համարակալումը առանցքային ուղղություն է այս փոփոխությունների շղթայում և զգալի դրական ազդեցություն կունենա սննդամթերքի անվտանգության տեսանկյունից՝ ապահովելով կենդական ծագման մթերքի հետագծելիությունն ու վերահսկելիությունը:
Փորձագետները ՍԱՊԾ մասնագետների հետ աշխատանքային կարգով քննարկել են համարակալման գործընթացի փուլերը և մեխանիզմները: Հայաստանում ծրագրի տևողությունը գնահատվել է երեք տարի, նախապատրաստական որոշ փուլեր արդեն ավարտվել են, ներկայումս գյուղատնտեսության նախարարության և միջազգային կազմակերպությունների հետ համատեղ բանակցություններ են տարվում ծրագրի ֆինանսավորման ուղղությամբ:
Գործընկերները քննարկել են համագործակցության հնարավոր ուղղությունները՝ համարակալման ծրագիրը տարածաշրջանային մակարդակով հաջողությամբ իրականացնելու նպատակով:
