ԵՐԵՎԱՆԻ ԺԱՄԱՆԱԿՈՎ. Եթե չկարողանանք ինքներս մեզ ախտորոշել ու բուժել, քարտեզի վրա տեղ չենք ունենա. Էդգար Բաղդասարյան. ՏԵՍԱՆՅՈՒԹ

«Իմիտացիան դարձել է մեր ազգի նկարագրի հիմնական ֆունդամենտը: Ո՞նց կարող էինք մեր գլխին դնել այն մարդկանց, որոնք այսօր ղեկավարում են մեզ. դա խոսում է այն մասին, որ մենք լուրջ հիվանդ ենք, ուրեմն ինչու՞ պետք է մեր մշակույթը, կինոն առողջ լինի: Մենք արժանի ենք նրան, ինչ մեզ հետ կատարվեց»,- Factor.am-ի հետ զրույցում նման տեսակետ է հայտնում կինոռեժիսոր Էդգար Բաղդասարյանը:

Նրա խոսքով` 30 տարի շարունակ հասարակության կրթության մակարդակն իջեցրել ենք, և այսօր էլ` պատերազմում պարտվելուց հետո, շարունակում ենք նույն քաղաքականությունը վարել. «Պետք է ընտրություններին «փսիխոյով» մասնակցել, ո՞վ է ասել, որ բոլորը պետք է ընտրելու իրավունք ունենան: Այն տրագեդիան, որ կատարվեց մեզ հետ, չի մտել մարդկանց գիտակցության մեջ. անցեք երևանյան ռեստորաններով և կտեսնեք, որ շատ մարդկանց կյանքում ոչինչ չի փոխվել, կարծես իրենք և զոհվածները նույն ազգից չլինեն: Ազգային մտածողություն չկա»:

Կինոռեժիսորը թունելի վերջում դեռևս լույս չի տեսնում: Ասում է` մեզ պետք են պետական, ոչ կուսակցական գործիչներ. «Այսօր ամբողջ ազգը իրար պիտակավորում ու հայհոյում է, իսկ թշնամին 3.5կմ մտնում է մեր սահման, մենք էլ ասում են` ամոթ իրենց: Մեզ մոտ հարստացան մարդիկ, որոնք պետք է շվեցար աշխատեին: Այդ մարդիկ այսօր օլիգարխ են և ուզում են ընտրությունների մասնակցել: Եթե չկարողանանք ինքներս մեզ ախտորոշել ու բուժել, քարտեզի վրա տեղ չենք ունենա»:

Էդգար Բաղդասարյանին առաջիկա խորհրդարանական ընտրությունները ևս հույս չեն ներշնչում, նա չի կարծում, թե դրանով վերջ կդրվի ներքաղաքական ճգնաժամին. «Իշխանությունը փորձում է պատասխանատվությունը կիսել մեզ հետ, դնել մեր վզին, մեղքի զգացում առաջացնել և լեգիտիմացնել այն, ինչ մեզ հետ կատարվեց. ես դա թույլ չեմ տա»:

Մանրամասները` տեսանյութում:

Աննա Բաբաջանյան