Պետք է բոլոր միջոցները սպառել, ուժի կիրառումը թողնել վերջում․ Մարուքյան. ՏԵՍԱՆՅՈՒԹ

Հայաստանը հայտնվել է ճգնաժամային իրավիճակում: Ադրբեջանը խախտելով Հայաստանի սահմանը՝ խախտել է մեր պետության օրենսդրությունը, տարածքային ամբողջականությունը: Այս մասին, այսօր մամուլի ասուլիսի ժամանակ նշեց ԱԺ «Լուսավոր Հայաստան» խմբակցության ղեկավար Էդմոն Մարուքյանը:

«Մեր գործողությունները կարող են լինել երկու ուղղությամբ, առաջինն այն է, որ հենց ի սկզբնե, հատելու ժամանակ փորձ արվեր կանխել և հարված հասցնել, եթե չէին կանգնում: Սակայն իրավիճակն այնպիսին է, որ նրանք եկել տեղակայվել են, հետո են հայտնաբերվել, որովհետև պատերազմից հետո մենք ունենք շուրջ 540 կմ նոր սահման, որն, ըստ էության, ոչ բոլոր տեղերում է կահավորված և ոչ բոլոր տեղերում կան զորքեր կամ սահմանապահներ: Հայտնաբերելուց հետո սկսվել են բանակցություններ: Հայկական կողմը լեգիտիմ իրավունք ունի բանակցությունների արդյունքում, եթե Ադրբեջանը չի զիջում, կիրառել իր ձեռքի տակ եղած բոլոր գործիքները, այդ թվում ուժ կիրառել: Սակայն այս պահին եղած բանակցությունները, միջոցները, որոնք կիրառվում են, ճիշտ է, որովհետև պետք է բոլոր միջոցները սպառել, նոր մնա վերջին միջոցը՝ ուժի կիրառումը: Հույս կա, որ բանակցությունների արդյունքում ադրբեջանական կողմը հետ կքաշվի»,-ասաց Մարուքյանը:

Նրա գնահատմամբ՝ ճիշտ քայլ է ՀԱՊԿ-ին դիմելը, որովհետև ՀԱՊԿ անդամ պետության սահմանում հասունանում է  նոր էսկալացիա: «Ես շատ եմ քննադատել նախկինում, որ չեն դիմել, հիմա ասում եմ, որ ճիշտ են արել, որ դիմել են:

Ակնհայտ է, որ սա ինձ համար ներքաղաքական բնույթի հարց չէ: Մենք անվտանգության հարցը, արտաքին թշնամու կողմից ստեղծված չգնաժամը որևէ ձևով չենք օգտագործել ներքաղաքական նպատակներով, և կոչ ենք անում մյուս ուժերին անել նույնը: Որովհետև եթե թշնամին ոնտձգություն է իրականացնում մեր սահմանի նկատմամբ, ապա այդ սահմանը ՔՊ-ի սահմանը չէ կամ Նիկոլ Փաշինյանի սահմանը չի: Դա ՀՀ սահմանն է, բոլորիս սահմանն է, և բոլորս միասին պետք է մի մարդու պես կանգնենք, էդ սահմանը պահենք: Եթե բանակցելու գործ է, բանակցենք, կռվելու գործ է՝ կռվենք»,- նշեց ԼՀԿ ղեկավարը:

Մանրամասները՝ տեսանյութում: