Մերձավոր Արևելքում տեղի ունեցողը կարող է ուղիղ ազդեցություն ունենալ Անդրկովկասի վրա․Փույա Հոսեյն. ՏԵՍԱՆՅՈՒԹ

Մերձավոր Արևելքի տարածաշրջանում, որտեղ խաչվում են գլոբալ ու ռեգիոնալ ուժային կենտրոնների շահերը, ռազմաքաղաքական իրավիճակը վերջին օրերին կտրուկ լարվել է:

Իսրայելում շարունակվում են հրթիռակոծություններն ու ավիահարվածները։ Իսլամիստական խմբավորումները երկուշաբթի գիշերը իսրայելական քաղաքների ուղղությամբ հարյուրավոր հրթիռներ են արձակել Գազայի հատվածից։ Իսրայելցի զինվորականները պատասխանում են հրթիռներով և ավիահարվածներով։ Զոհերի թիվն աճում է։

Անհանգիստ է իրավիճակը նաև հարևան Իրանի շուրջ: Արևմուտքի հետ Թեհրանի հարաբերությունների և միջուկային ծրագրի հեռանկարները որքան մշուշուտ, այնքան էլ անհանգստացնող են:

Տարածաշրջանում շարունակում է ագրեսիվ կերպով իր շահերն առաջ տանել Թուրքիան: Ռուսաստանի հետ Անկարայի ուժային հարաբերությունների գիծը լարվածության տարբեր աստիճաններով սկսվում է Ուկրաինայից, անցնում Հարավային Կովկասով, որի շփման գծում նաև Հայաստանն է, ու ձգվում մինչև Կենտրոնական Ասիա:

Մերձավոր Արևելքում ռազմաքաղաքական իրավիճակի, դեռևս կես տարի առաջ պատերազմ տեսած Հարավային Կովկասի վրա դրա անուղղակի և ուղղակի ազդեցութուններին ու վտանգներին անդրադարձ կատարվեց «Թեժացած Մերձավոր Արեվելք. վտանգներ Հարավային Կովկասի համար» թեմայով առցանց քննարկման ժամանակ:

Թեմայի շուրջ իր դիտարկումները ներկայացրեց «Հայաստան-Իրան ռազմավարական համագործակցության զարգացման կենտրոն» հիմնադրամի հիմնադիր տնօրեն Փույա Հոսսեյնին:

Նա ընդգծեց, որ Մերձավոր Արևելքում տեղի ունեցողը կարող է ուղիղ ազդեցություն ունենալ Անդրկովկասի վրա:

«Արցախի պատերազմից հետո Անդրկովկասը գերտերությունների հակամարտությունների երկրորդ օջախն է դարձել: Հակամարտությունը որոշ ժամանակով սառեցված է, բայց շարունակվում է հիբրիդային պատերազմը: Ադրբեջանի ու Թուրքիայի կողմից սպառնալիքները շարունակվում են, բացի Արցախից՝ նաև Սյունիքի և ընդհանրապես Հայաստանի վերաբերյալ: Այն, ինչ տեղի է ունենում տարածաշրջանում, կարող է ուղիղ ազդեցություն ունենալ Անդրկովկասի վրա, և ամեն կրակ կարող է մի մեծ հրդեհ բռնկել տարածաշրջանում»,- նշեց Հոսսեյնին՝ ընդգծելով նաև, որ Հայաստանը պետք է հստակեցնի իր անվտանգային հարցերը Իրանի և Ռուսաստանի հետ:

Մանրամասները՝ տեսանյութում: