14.09.2026 | 18:19
Փաշինյանն ու Բունդեսթագի պատվիրակությունը քննարկել են Հայաստան–Գերմանիա և Հայաստան–ԵՄ հարաբերությունները
Առաջին եռամսյակում զբոսաշրջությունը նվազել է 72%-ով․ Հայաստան է այցելել 86․524 զբոսաշրջիկ
11.05.2021 | 22:17
Այս տարվա առաջին եռամսյակում Հայաստան է այցելել 86․524 զբոսաշրջիկ, ինչը, նախորդ տարվա նույն ժամանակահատվածի համեմատ, պակաս է շուրջ 72%-ով։ Այս մասին են վկայում Պետական վիճակագրական կոմիտեի հրապարակած տվյալները։
Այսպես՝ 2019 թվականի հունվար-մարտին Հայաստան է այցելել 364․489 զբոսաշրջիկ, 2020թ․ նույն ժամանակահվածում՝ 311․264, իսկ 2021-ին՝ 86․524 զբոսաշջիկ։
Այս տարվա հունվար-մարտին Հայաստան եկած զբոսաշրջիկների 34.9%-ը կամ 30․213-ը եղել են Ռուսաստանի քաղաքացիներ, 30.8%-ը կամ 26․633-ը՝ Հայաստանի քաղաքացիներ, 10.9%-ը կամ 9․394-ը՝ Իրանի, իսկ 10.3%-ը կամ 8․911-ը՝ Վրաստանի քաղաքացիներ։
Հիշեցնենք, որ նախորդ տարվա մարտին, կորոնավիրուսով պայմանավորված, երկրում հայտարարվեց արտակարգ դրություն, որի ընթացքում սահմանը հատելու սահմանափակումներ մտցվեցին։
Չնայած այս տարի Հայաստանը բացել է իր սահմանները աշխարհի համար, այնուամենայնիվ, թվերը վկայում են, որ զբոսաշրջության ոլորտն առայժմ չի վերականգնվում։
Ապրիլ և մայիս ամիսների վերաբերյալ առայժմ տվյալներ չկան, սակայն Զբոսաշրջության կոմիտեի հանրային կապերի և թվային մարքեթինգի փորձագետ Գայանե Այվազյանի խոսքով՝ մայիսյան տոներին Հայաստանում զբոսաշրջության ոլորտում աշխուժություն է նկատվում՝ հատկապես ռուսաստանցի զբոսաշրջիկների կողմից:
«Մայիսի առաջին տասնօրյակում մենք հաճախ տեսնում էինք ռուս զբոսաշրջային խմբերի, ինչը չէր կարող չոգևորել ոլորտի ներկայացուցիչներին: Կարող եմ ասել, որ նույնիսկ սոցցանցերի ոչ պաշտոնական խմբերում քննարկվում էր ռուսաստանցի զբոսաշրջիկների հետ աշխատող զբոսավարների պահանջարկի հարցը, ինչը ոգևորիչ էր»,- ասաց Գայանե Այվազյանը:
Նրա խոսքով՝ այնուամենայնիվ, ոլորտի առողջացման մասին խոսելու համար դեռ վաղ է։ Հայաստանը բացել է իր սահմաններն աշխարհի համար, սակայն բազմաթիվ երկրներ, համավարակով պայմանավորված, շարունակում են փակ մնալ, ինչը խոչընդոտ է զբոսաշրջության համար, և այդ սահմանափակումները դեռ որոշակի մարտահրավերների առջև են կանգնեցնում ոլորտը:
«Համաշխարհային ուսումնասիրությունները ցույց են տալիս, որ 2023 թվականից հետո նոր հնարավոր կլինի խոսել զբոսաշրջության լիարժեք վերականգնման մասին»,- նշեց Այվազյանը։
Անժելա Պողոսյան
