Ընտրական անցողիկ շեմը կփոխվի․ ԱԺ-ն ամբողջությամբ ընդունեց ԸՕ փոփոխությունների նախագիծը

ԱԺ-ն արտահերթ նիստում 81 կողմ ձայնով երկրորդ ընթերցմամբ  և ամբողջությամբ ընդունվեց «Իմ քայլը» խմբակցության կողմից ներկայացված «ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին և կից ներկայացված նախագծերի փաթեթը:

Նախագծով կիջեցվի կուսակցությունների համար նախատեսված շեմերը` 5-ից դարձնել 4%, իսկ դաշինքներինը` կբարձրացվի: Մինչև 3 կուսակցությունների դեպքում շեմը կդառնա 8%, իսկ 4 և ավելի կուսակցություններից բաղկացած դաշինքների դեպքում` 10 տոկոս:

«էապես նվազեցվելու է ԱԺ պատգամավորների ավելացման հնարավորությունը: Սահմանադրությամբ նախատեսված է նվազագույն թիվ` 101 պատգամավոր + 4 պատգամավոր ազգային փոքրամասնություններից, հավանականությունը, որ այս խաղի կանոններով լրացուցիչ տեղեր կավելացվեն պատգամավորների, էապես նվազեցվում է, բայց դրանից չեն տուժում փոքրամասնության երաշխավորված տեղերը, խորհրդարանն էլ ավելի ներառական է դառնում»,- ասաց նախագիծը ներկայացնող պատգամավոր Համազասպ Դանիելյանը:

Նախագծով կփոխվի նաև ընտրական անցողիկ շեմը։ Կուսակցությունների համար 5%-ի փոխարեն այն կդառնա 4 %, իսկ դաշինքների դեպքում  անցողիկ շեմը կաճի՝ մինչև 3 կուսակցությունների դաշինքների կազմման դեպքում ՝ 8%, իսկ 4 և ավելի կուսակցությունների դաշինքի դեպքում՝ 10 %:

Նախագծի մեկ այլ փոփոխությամբ ընդլայնվում են հայտարարագրման ծախսերը։ Մասնավորապես՝ եթե նախկինում անվճար տրամադրվում էր գույք և այլ ծառայություն և դա հնարավոր էր չհայտարարագրել, այս պարագայում դա հնարավոր չէ։

Հանրային հեռուստաընկերությամբ թեկնածուների մասնակցությամբ բանավեճը դառնում է պարտադիր պայման։

Փոխվել է նաև ընտրական գրավի չափը։ Այն դարձել է 7,5 մլն դրամ՝ նախկին 10 մլն դրամի փոխարեն։

Նախագծի հեղինակները ընդգծեցին, որ այս փոփոխությունները չեն անդրադառնալու առաջիկա արտահերթ ընտրություններին․ դրանք իրականացվելու են այս պահին գործող ընտրական օրենսգրքով։

Մանրամասները՝ տեսանյութում: