Դատական համակարգի վեթինգի նախագիծ եմ բերում՝ որպես օգնություն․ Բաբաջանյանը՝ «Իմ քայլին». ՏԵՍԱՆՅՈՒԹ

ԱԺ անկախ պատգամավոր Արման Բաբաջանյանը խորհրդարանում անդրադարձավ «Իմ քայլը» խմբակցության պատգամավոր Վլադիմիր Վարդանյանի հայտարարությանը դատաիրավական համակարգում ստեղծված իրավիճակի մասին:

Նշենք, որ Վլադիմիր Վարդանյանը ԱԺ այսօրվա նիստում հայտարարել էր. «Այս իշխանության ուժը նրա մեջ է, որ մենք չենք կարողանալու ու չենք ուզում կարողանալ որևէ եղանակով միջամտել դատական իշխանության, դատախազական մարմինների, իրավապահ համակարգի գործունեությանը»:

«Այսպիսի ինքնախոստովանությունը ոչ թե մտահոգիչ է, ես կարծում եմ՝ ուղղակի սպառնալիք է ազգային անվտանգությանը, որովհետև ձեր չկարողանալու և դատաիրավական համակարգում փնթի իրականության և աշխատանքի արդյունքում վերակենդանացել է հանցագործների մի ամբողջ շքախումբ և շատ վտանգավոր քաղաքական հայտ է ներկայացրել:

Ձեր չկարողանալուց օգտվել են նրանք, ովքեր նախկինում կարողանում էին զանգով, կոմպրոմատներով իրենց խնդիրներն առաջ տանել դատական համակարգում: Ձեր չկարողանալու արդյունքում այսօր այդ հանցագործները մարդու իրավունքներից, արդարությունից և քաղաքական հաշվեհարդարից են խոսում:

Հայաստանին անհրաժեշտ է այնպիսի դատարան, որը թքած կունենա, թե ովքեր են Հայաստանի այդ օրվա նախագահը և վարչապետը, նախարարն ու պատգամավորը, և իսկապես կիրականացնի արդարադատություն՝ առանց հաշվի առնելու, թե ով է ամբաստանյալը՝ երբևէ նախագահի պաշտոնը զբաղեցրած անձը, պետությունը թալանած չինովնիկը, թե շարքային գրպանահատ»,- նշեց Բաբաջանյանը: