Չենք պատրաստվում հետքայլ կատարել ու վերադառնալ հեռախոսային արդարադատությանը․ Վլադիմիր Վարդանյան. ՏԵՍԱՆՅՈՒԹ

Հայաստանը դասվում է համաշխարհային մակարդակով ամենացածր հանցավորություն ունեցող երկրների թվին: Այս մասին Դատախազության 2020-ի գործունեության մասին հաղորդման քննարկման ժամանակ իր ելույթում ընդգծեց «Իմ քայլը» խմբակցության պատգամավոր Վլադիմիր Վարդանյանը:

«Պետք է ձգտենք դառնալ առավել քիչ հանցավորություն ունեցող երկիր, և համոզված եմ՝ ունենք նախադրյալներ: Պետք է շարունակենք այս ուղղությամբ գնալ առաջ: Հայաստանը հանցավորության տեսանկյունից անվտանգ է կամ առավել քիչ վտանգավոր է, քան ցանկացած որևիցե այլ երկիր, որովհետև ցուցանիշները ցույց են տալիս, որ մենք առաջին տասնյակի մեջ ենք նվազ հանցավորություն ունեցող երկրների շարքում»,- նշեց Վարդանյանը՝ հավելելով, որ 2018-ին՝ հեղափոխության տարում, արձանագրվել է աննախադեպ ցածր թվով սպանության դեպքեր՝ ընդամենը 35:

Վարդանյանը կարծիք հայտնեց, որ այս իշխանության հաջողություններից մեկն այն է, որ ունենք անկախ դատական իշխանություն:

«Մեզ մեղադրում են նրանում, որ մենք թույլ ենք, որ մենք չենք կարողանում հստակ հարաբերություններ հաստատել դատական իշխանության հետ, չենք կարողանում կարգավորել դատախազության հետ կապված հարցերը: Այս իշխանության ուժը նրա մեջ է, որ մենք չենք կարողանալու ու չենք ուզում կարողանալ որևէ եղանակով միջամտել դատական իշխանության, դատախազական մարմինների, իրավապահ համակարգի գործունեությանը,- նշեց Վարդանյանը: Այսօր դժվար է հասկանալ այդ ամենը, սակայն տարիներ անց այդ գործունեությունը կգնահատվի: Հավատացնում եմ, որ կանցնեն տարիներ, և այն, ինչ այսօր տեղի է ունենում, կգնահատեն, որպես անկախ դատական իշխանության, իրենց գործունեությունն արժանապատիվ իրականացնող իրավապահ համակարգի ձևավորման տարիներ: Չենք պատրաստվում հետքայլ կատարել ու վերադառնալ հեռախոսային արդարադատությանը կամ գործադիրի կցորդ հանդիսացող արդարադատությանը»:

Մանրամասները՝ տեսանյութում: