Ընտրական անցողիկ շեմը կփոխվի․ ԱԺ-ն առաջին ընթերցմամբ ընդունեց ԸՕ փոփոխությունների նախագիծը․ ՏԵՍԱՆՅՈՒԹ

Ազգային ժողովն այսօր արտահերթ նիստում առաջին ընթերցմամբ ընդունեց «Իմ քայլը» խմբակցության հեղինակած ««ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» և կից ներկայացված օրենքների նախագծերի փաթեթը:

Նախագիծն ընդունվեց ձայների 82 «կողմ» և 1 «ձեռնպահ» հարաբերակցությամբ։

«Իմ քայլը» խմբակցության անդամ Համազասպ Դանիելյանը, ներկայացնելով նախագիծը, նշեց, որ դրա ընդունման դեպքում էապես նվազելու է Ազգային ժողովի պատգամավորների թվի ավելացման հնարավորությունը:

«Կարևոր մի դրույթ՝ էապես նվազեցվելու է ԱԺ պատգամավորների ավելացման հնարավորությունը: Սահմանադրությամբ նախատեսված է նվազագույն թիվ՝ 101 պատգամավոր՝ + 4 պատգամավոր ազգային փոքրամասնություններից։ Հավանականությունը, որ այս խաղի կանոններով լրացուցիչ տեղեր կավելացվեն պատգամավորների, էապես նվազեցվում է, բայց դրանից չեն տուժում փոքրամասնության երաշխավորված տեղերը, խորհրդարանն էլ ավելի ներառական է դառնում»,- ասաց Դանիելյանը:

Նախագծով կփոխվի նաև ընտրական անցողիկ շեմը։ Կուսակցությունների համար 5%-ի փոխարեն այն կդառնա 4%, իսկ դաշինքների դեպքում անցողիկ շեմը կավելանա՝ մինչև 3 կուսակցությունների դաշինքների կազմման դեպքում՝ 8%, իսկ 4 և ավելի կուսակցությունների դաշինքի դեպքում՝ 10%:

Նախագծի մեկ այլ փոփոխությամբ ընդլայնվում են հայտարարագրման ծախսերը։ Մասնավորապես, եթե նախկինում անվճար տրամադրվում էր գույք և այլ ծառայություն, և դա հնարավոր էր չհայտարարագրել, այս պարագայում այլևս հնարավոր չէ։

Հանրային հեռուստաընկերությամբ թեկնածուների մասնակցությամբ բանավեճը դառնում է պարտադիր պայման։

Փոխվել է նաև ընտրական գրավի չափը։ Այն դարձել է 7․5 մլն դրամ՝ նախկին 10 մլն դրամի փոխարեն։

Նախագծի հեղինակներն ընդգծեցին, որ այս փոփոխությունները չեն անդրադառնալու առաջիկա արտահերթ ընտրությունների վրա․ դրանք անցկացվելու են այս պահին գործող Ընտրական օրենսգրքով։