Սյունեցի երիտասարդը ասում էր՝ ո՞վ ինձ աղջիկ կտա այս համայնքում, այս իրավիճակում․ Սամսոնյան. ՏԵՍԱՆՅՈՒԹ

Սյունիքի անվտանգության խնդիրների վերաբերյալ ավելի շատ ՄԻՊ զեկույցում արտացոլված փաստերին եմ վստահությամբ մոտենում: Այս մասին ԱԺ ամբիոնից հայտարարեց «Լուսավոր Հայաստան» խմբակցության պատգամավոր Անի Սամսոնյանը:

«Ելնելով քաղաքական իրադրությունից՝ տարբեր շահարկումների է ենթարկվում Սյունիքի անվտանգության հարցը, իսկ ՄԻՊ զեկույցում առանցքը ոչ թե քաղաքականությունն է, այլ մարդը և նրա իրավունքները, և այստեղ է, որ մենք կարողանում ենք օբյեկտիվ պատկերացումներ կազմել Սյունիքում տիրող իրավիճակի մասին: Իսկ Սյունիքում և մեր նոր սահմանամերձ բնկավայրերում իրավիճակը լավ չէ, մարդիկ մտածում են, որ եթե անգամ շարունակեն ապրել իրենց համայնքում և շարունակեն պաշտպանել իրենց համայքը, արդյո՞ք կկարողանան այնտեղ ընտանիք կազմել: Մի սյունեցի երիտասարդ հարցազրույց էր տվել և ասել՝ ո՞վ ինձ աղջիկ կտա այս համայնքում, այս իրավիճակում»- նշեց Սամսոնյանը՝ ընդգծելով, որ ՄԻՊ զեկույցը լավ նյութ է՝ խնդիրների ուսումնասիրության համար:

«Վերջերս ծանոթներիցս մեկը հարց տվեց, թե ինչո՞վ է պայմանավորված, որ Հայաստանի ՄԻՊ-ի դեմ միաժամանակ արշավ են իրականացնում թե՛ իշխանական պաշտոնյաները, թե՛ ադրբեջանական մեդիան»,- նշեց Սամսոնյանը և, դիմելով իմքայլական պատգամավորներն, հարցրեց, թե արդյո՞ք ունեն այդ հարցի պատասխանը:

Պատգամավորը նկատեց, որ 2019 թվականի ՄԻՊ զեկույցում բարձրացված հարցերը կան նաև այս զեկույցում, ինչը փաստում է, որ իշխանություններն անհաղորդ են դրանում բարձրացված խնդիրներին և բազմաթիվ խնդիրներ չեն լուծվում, բայց դրա փոխարեն իշխանությունը կարող է նախագիծ բերել ԱԺ և որոշել, որ Մարդու իրավունքների պաշտպանի ֆինանսական երաշխիքները պետք է հանվեն, ինչն անտրամաբանական է:

Սամսոնյանը նշեց, որ բարեբախտաբար թե՛ արտաքին ճնշումների, թե՛ ներքին հորդորների արդյունքում այդ նախագիծը հեռացվեց օրակարգից, բայց դրանով փորձում էին մեծ վնաս հասցնել պաշտպանի հեղինակությանը:

«Ես վստահ եմ՝ բոլորն էլ ուրախանում են, երբ ՄԻՊ-ը զեկույցներ է գրում և ուղարկում միջազգային կառույցներին, բայց այդ նախագիծն այստեղ բերելիս մի րոպե անգամ չեն մտածել, որ այն զեկույցներ գրելու ընթացակարգերին կարող է վնաս տան»,- նկատեց պատգամավորը:

Նա շեշտեց, որ պաշտպանի հեղինակությանը նաև կարող են վնասել որոշ պաշտոնյաններ՝ սոցիալական ցանցերում անպատասխանատու հայտարարություններ անելով, իսկ Արման Թաթոյանը իր բան ու գործը թողած ստիպված դիմում է դատախազություն՝ իր իրավունքները պաշտպանելու համար:

«Սոցիալական ցանցերում վիրավորում են ՄԻՊ-ին,  սպառնում են, ոչ հարգալից վերաբերմունք են ցույց տալիս, նույնիսկ հարձակումներն ուղեկցվում են պաշտոնից հեռացնելու գործընթաց սկսելու հայտարարություններով,և դա տեղի է ունենում այն ժամանակ, երբ պաշտպանը զբաղվում է Սյունիքի անվտանգության հարցերով»,- հայտարարեց Անի Սամսոնյանը:

Ըստ պատգամավորի՝ այդ հարձակումներն առնչվում են Մարդու իրավունքի պաշտպանի այն հայտարարություններին, որոնք վերաբերում են Սյունիքում մարդու իրավունքների խախտմանը, սահմանների անվտանգությանը, քաղաքացիական բնակչության հանդեպ ադրբեջանական սադրանքներին և միաժամանակ Թաթոյանի դեմ արշավ է սկսում Ադրբեջանի մեդիան. սա շատ լուրջ մտահոգության տեղիք պետք է տա:

Մանրամասները՝ տեսանյութում: