ԱԺ 105 պատգամավորներից 40-ը շարունակում են լռել. 6-րդ գումարման ԱԺ-ի ամենաակտիվ, ամենահարուստ և առավելապես «լուռ» պատգամավորները

Խորհրդարանական համակարգին անցնելիս, նշվում էր, որ Ազգային ժողովի դերը շեշտակի կբարձրանա, մենք կունենանք որակապես նոր Խորհրդարան։ Սակայն «Մանդատ» հասարակական կազմակերպության կողմից 6-րդ գումարման Ազգային ժողովի գործունեության ուսումնասիրության արդյունքները ցույց են տալիս, որ այդ փոփոխությունները դեռևս տեսանելի չեն։

Մասնավորապես, ըստ այսօր ներկայացված զեկույցի, ԱԺ 105 պատգամավորներից 40-ը շարունակում են ցուցաբերել զրոյական ակտիվություն պառլամենտական աշխատանքում: Այսպես կոչված՝ լուռ պատգամավորները հիմնականում իշխող «Հանրապետական» խմբակցությունից են՝ 58 հոգուց 26-ը, և «Ծառուկյան» դաշինքից՝ 31 հոգուց՝ 14-ը: Ու թերևս զարմանալի չէ, որ այսպիսի կազմով ներկայիս խորհրդարանը 90 տոկոսով հաստատում է Կառավարության ներկայացրած օրենսդրական նախաձեռնությունները:

Ըստ parliamentmonitoring.am կայքի վիճակագրության՝ 6-րդ գումարման Ազգային ժողովում 2017 թվականի ընթացքում ՀՀԿ խմբակցության ամենաշատ հարց տված և ելույթ ունեցած պատգամավորը Խոսրով Հարությունյանն է: «Ծառուկյան» խմբակցության պատգամավորներից ամենաշատը հարց է տվել Սերգեյ Բագրատյանը, ամենաշատը ելույթ է ունեցել Միքայել Մելքումյանը: Իսկ «Ելք» խմբակցության ամենաշատ հարց տված և ելույթ ունեցած պատգամավորը Արտակ Զեյնալյանն է։ Նա, ի դեպ, գլխավորում է խորհրդարանի ամենաակտիվ պատգամավորների տասնյակը:

Զեկույցի հեղինակները նաև անդրադարձել են պատգամավորների դրամական միջոցներին։ Ըստ հայտարարագրված տվյալների՝ ԱԺ-ում կա 11 դոլարային միլիոնատեր։ Նրանցից 6-ը ՀՀԿ-ից են, 5-ը՝ «Ծառուկյան» խմբակցությունից: Ամենից շատ դրամական միջոցներ հայտարարագրած պատգամավորը, ինչպես և նախորդ գումարման խորհրդարանում, Գագիկ Ծառուկյանն է՝ 9 մլրդ 90 մլն դրամ։ Նա նաև գլխավորում է ամնաշատ բացակայած պատգամավորների ցանկը՝ 261 բացակայությամբ։ Դրամական միջոցներով աչքի ընկնող երկրորդ պատգամավորը ՀՀԿ-ական Սամվել Ալեքսանյանն է՝ 4 մլրդ 249.8 մլն դրամ, իսկ երրորդը՝ դարձյալ ՀՀԿ-ական Աշոտ Արսենյանը 3 մլրդ 679.4։

Մանրամասները՝ տեսանյութում:

Լիլիթ Շաբոյան