12.12.2024 | 13:24
Կադիրովը պնդում է, որ Ուկրաինան ԱԹՍ-ներով հարձակվել է Չեչնիայի ՆԳՆ հատուկ գնդի զորանոցի վրա
«Հայրենիքի» էստակադայի նախագիծը սառեցվել է․ քաղաքապետարանի շինարարական ծրագրերի ճակատագիրը․ ՏԵՍԱՆՅՈՒԹ
Քաղաքականություն
03.05.2021 | 21:50
Արշակունյաց պողոտայում և Գարեգին Նժդեհ փողոցում խցանման մեջ չես հայտնվի միայն օրվա որոշակի ժամերի, այն էլ՝ ոչ միշտ։ Դեռ 2019թ. փետրվարին քաղաքապետ Հայկ Մարությանը Ֆեյսբուքում գրառում էր կատարել` հայտնելով, որ գլխավոր ճարտարապետ Արթուր Մեսչյանի հետ քննարկում են «Հայրենիք» կինոթատրոնի հարակից հրապարակի տրանսպորտային հանգույցի նախագիծը։
«Այն զգալիորեն կթեթևացնի երթևեկությունը Արշակունյաց պողոտայի և Գարեգին Նժդեհի փողոցի հատման հատվածում՝ ապահովելով անընդհատ երթևեկություն»,- գրել էր Մարությանը։
Քաղաքապետի մամուլի խոսնակ Հակոբ Կարապետյանն էլ տեղեկացրել էր՝ այս հանգույցի կառուցման արժեքը կկազմի շուրջ 4 մլն դոլար։ Երևանի հնգամյա զարգացման պլանում, սակայն, այս նախագիծը տեղ չի գտել։ Քաղաքապետարանից պարզաբանել են՝ առաջնահերթության կարգով իրականացվում է Բաբաջանյան-Աշտարակ, Արգավանդ-Շիրակ ճանապարհահատվածների կառուցումը։
Նախ՝ այդ ճանապարհների մասին։ 2-ն էլ բաղադրիչներն են Երևանի արևմտյան օղակաձև ճանապարհի, դրանց շինարարությունը նախատեսվում է ավարտին հասցնել այս տարի։ Factor TV-ի հետ զրույցում այս մասին նշեց «Երևանի կառուցապատման ներդրումային ծրագրերի իրականացման գրասենյակ» ՀՈԱԿ-ի տնօրենի տեղակալ-ծրագրի ղեկավարը։ Արդյունքում Երևանի հյուսիսը կկապվի հարավի հետ՝ կրճատելով նաև երթևեկության ժամանակը։
Ճարտարապետ Անահիտ Թարխանյանը համակարծիք է՝ կառուցվող ճանապարհները կարևոր են, բայց քաղաքի ընդհանուր բեռնաթափման գործում մեծ դեր չեն ունենա։ Ճարտարապետը նշում է՝ «Հայրենիք» կինոթատրոնին հարակից էստակադան ևս լավ լուծում կլիներ։ Ինչո՞ւ դեռ մակետից իրականացվող նախագծի չի վերածվում՝ չգիտի։ Ամեն դեպքում, նշում է՝ էստակադային փոխարինող ավելի մատչելի լուծումներ էլ կան։
Անահիտ Թարխանյանի խոսքով՝ Երևանում երթևեկության հարցը չի լուծվի, քանի դեռ լուծված չէ հանրային տրանսպորտի հարցը։
Երևանի ավագանու անդամ Թեհմինա Վարդանյանը մեզ հետ զրույցում նշում է՝ միայն «Հայրենիքի» էստակադան չէ, որ խոստացված ու չարված նախագծերի շարքում է։ Ավագանու անդամը հիշեցնում է՝ չիրականացվող խոստման մասին դեռ 2019 թվականին է բարձրաձայնել։
Քաղաքապետարանին ուղղված հարցին՝ ե՞րբ կսկսվի հենց այս էստակադայի կառուցումը, նշեցին՝ նախագիծն այս պահին սառեցված է, այլ մանրամասներ հաղորդել չեն կարող։
Մանրամասները՝ տեսանյութում։
Իրինա Մկրտչյան
