Մի կայացած ինստիտուտ կար՝ կոռուպցիան, քանդեցինք, պարզվեց՝ դա միակ հենարանն էր․ Փաշինյան. ՏԵՍԱՆՅՈՒԹ

Փորձը ցույց տվեց, որ անձնավորված սահմանադրական փոփոխությունները լավ բան չեն: Այս մասին ԱԺ հատուկ նիստում նշեց վարչապետի պաշտոնակատար, վարչապետի թեկնածու Նիկոլ Փաշինյանը՝ ի պատասխան պատգամավոր Սերգեյ Բագրատյանի՝ սահմանադրական փոփոխություններով խորհրդարանի ինքնալուծարմանը հասնելու վերաբերյալ հարցին:

«Այդ առաջարկը եղել է հենց 2018-ին, որ Սահմանադրությունը փոխենք, բայց ես ինքս այդ օրակարգին չեմ համաձայնել մի պարզ պատճառով, որովհետև հասկացել եմ, որ դա մեկնաբանվելու է որպես հերթական անձնավորված փոփոխություններ: Բայց մեր Սահմանադրությունը շատ լուրջ խնդիրներ ի հայտ բերեց, դա ակնհայտ է: Պատկերացրեք՝ երկրում պետական հեղաշրջման իրավիճակ է, և այդ իրավիճակը արմատախիլ անելը տևում է 15 օր:

Մենք պետք է Սահմանադրություն գրելիս անձի նկատի չունենանք, այլ ինստիտուտների: Մեր այսօրվա պրոբլեմներն ինչի՞ հետ են կապված, որ 30 տարի հետո պարզվեց, որ երկրում ոչ մի կայացած ինստիտուտ չկա, և դա մեր մեծագույն պրոբլեմն է: Դա է պատասխանը՝ ինչու այսպես եղավ, որովհետև երկրում մեկ կայացած ինստիտուտ կար, մենք եկանք, դա քանդուքարափ արեցինք, դա կոռուպցիան էր»,- նշեց Փաշինյանը:

Վարչապետի պաշտանակատարի խոսքով՝ հիմա պատժի հնարավորություն է տրվում ժողովրդին, որ սկսած իրենցից՝ ում ինչ պատասխանատվության ուզում է՝ ենթարկի:

«Արձանագրում եմ, որ մենք իշխանության ենք եկել 2018-ի ոչ բռնի, թավշյա հեղափոխությամբ, այսօր մենք ապացուցում ենք, որ սկզբունքներից չենք շեղվում, ժողովրդի իշխանությունը Հայաստանում պետք է մնա անսասան և անձեռնմխելի»,- նշեց Փաշինյանը:

Մանրամասները՝ տեսանյութում: