20.12.2025 | 18:06
Ֆուտզալի միջազգային ընկերական մրցաշարի մասնակիցներից մեկը չի ժամանել Երևան
Վերլուծել ենք պատերազմում խոշտանգումների 300 տեսանյութ և միջազգային կառույցներին ուղարկել․ ՀՀ ՄԻՊ. ՏԵՍԱՆՅՈՒԹ
Հասարակություն
30.04.2021 | 13:18
Ադրբեջանի կողմից Արցախ դեմ սանձազերծած պատերազմում ադրբեջանական կողմից խոշտանգումները, դաժանությունները ոչ թե պարզապես առանձին զինվորականների արարքներ էին, այլ միասնական քաղաքականութայն մասեր: Այս համոզմունքը հայտնեց ՀՀ ՄԻՊ Արման Թաթոյանը Ազգային ժողովի Մարդու իրավունքների պաշտպանության և հանրային հարցերի մշտական հանձնաժողովի նիստում «2020 թվականի ընթացքում ՀՀ մարդու իրավունքների պաշտպանի գործունեության, մարդու իրավունքների եւ ազատությունների պաշտպանության վիճակի մասին» տարեկան հաղորդման ներկայացմանը:
«Այս պատերազմի ընթացքում, բացի Ադրբեջանի կողմից արգելված հանրահայտ զինատեսակների օգտագործումը, վարձկանների օգտագործումը, խոշտանգումները, դաժանությունները, նաև լրջագույն խնդիր էր ադրբեջանական ատելության, թշնամանքի քարոզի և այսօր արդեն ֆաշիզմի հասնող քաղաքականությունը, որը էթնիկ հիմքով բռնության, խոշտանգումների, դաժանությունների հիմքում էր»,-ասաց Թաթոյանը:
Պատերազմի ընթացքում, երբ սկսվել է մարդկային կոնտակտը, ադրբեջանական զինված ուժերը սկսել են դաժանությունները նաև այս պատերազմի ժամանակ՝ ինչպես և 2016-ի ապրիլին: «Միանգամից բացվեցին «Տելեգրամի» ալիքներ, որոնք մեր դիտարկմամբ՝ Ադրբեջանի իշխանությունների հետ կապված էին, և մտադրված կերպով Հայաստանի սոցիալական տիրույթներում տարածում էին բռնությունների, դաժանությունների տեսարաններ: Ընդ որում, ունեինք դեպքեր, երբ մեկ դեպքի վերաբերյալ տեսանյութը բաղդատվում էր մի քանի մասերի, հատուկ էր այդպես արվում՝ էլ ավելի մեծ տանջանքներ պատճառելու համար»,-ասաց ՄԻՊ-ն ու նշեց, որ Ադրբեջանում հայերի նկատմամբ ատելության և թշնամանքի քաղաքականությունը, բնականաբար, նոր չէ, այն սրվել է պատերազմի ընթացքում, իսկ հիմա՝ ավելի նոր դրսևորումներ ստացել:
ՄԻՊ աշխատակազմը հատուկ ուսումնասիրել է Ալիևի ելույթները, վերլուծել է շուրջ 300 տեսանյութ, թարգմանել ռուսերեն և անգլերեն, դրանք և խոշտանգումների բոլոր տեսանյութերն ուղարկել միջազգային կառույցներին: «Մենք ցույց ենք տվել, որ դրանք Ադրբեջանի նախագահի խոսքերն են, ցույց ենք տվել, որ դրանք ոգեշնչող նշանակություն ունեին պատերազմի ժամանակ՝ Ադրբեջանի զինված ուժերի համար»,- ասաց Թաթոյանը:
Նա շեշտեց, որ խոսքը պատերազմական հանցագործությունների մասին է: «Այս խոշտանգումները, դաժանությունները ոչ թե առանձին վերցրած առանձին զինվորականների արարաքներ էին, այլ միասնական քաղաքականության մասեր, որովհետև դրանք հետագայում արժանանում էին մեծագույն գովասանքի Ադրբեջանում, խրախուսվում իշխանությունների, այլ գործիչների կողմից»,- ասաց Թաթոյանը:
