Մենք կանգնած ենք պատերազմի շեմին և ԱՄՆ-ը մեզ զգուշացնում է. Ստեփան Գրիգորյան

Հայաստանը պետք է լուրջ վերաբերվի ԱՄՆ Ազգային հետախուզության գրասենյակի հրապարակած զեկույցին՝ համաձայն որի Ղարաբաղի խնդրի շուրջ լարվածությունը կարող է վերածվել Հայաստանի և Ադրբեջանի միջև լայնածավալ ռազմական հակամարտության:

Factor.am-ի հետ զրույցում նման տեսակետ հայտնեց  Գլոբալիզացիայի եւ տարածաշրջանային համագործակցության վերլուծական կենտրոնի նախագահ, քաղաքագետ Ստեփան Գրիգորյանը:

«Զեկույցում չի նշվում, թե ինչու է հնարավոր, որ լայնածավալ ռազմական գործողություններ սկսվեն: Այսինքն՝ փակագծերն ամբողջությամբ չեն բացվում և չեն նշվում գլխավոր գործոնները: Իհարկե, դա նորմալ է, որ բոլոր փակագծերը չեն բացում, որպեսզի իրենց ինֆորմացիայի աղբյուրը չբացահայտվի»,- նշեց քաղաքագետը՝ նկատելով, որ ԱՄՆ Ազգային հետազոտության գրասենյակի կողմից հնչեցված այդ գնահատականը մոտ է իրականությանը:

Ըստ քաղաքագետի՝ ընտրությունների օրը փոխելու Ալիևի որոշումն արդեն խոսում է այն մասին, որ նա պատերազմի է պատրաստվում: «Ես կարծում եմ՝ մի քանի գործոնների առկայությունն էլ հենց թույլ տվեց, որ ամերիկացիները նման հայտարարություն անեն: Կասկած չունեմ, որ եթե անգամ Ադրբեջանում վերջնականապես դա չեն հասկանում, ապա ԱՄՆ-ում հասկանում են՝ Հայաստանում անցումը պառլամենտական համակարգի և դրա շուրջ ստեղծված խառնաշփոթը, երբ պարզ չէ, թե պատերազմի ժամանակ ով է լինելու բանակի գերագույն գլխավոր հրամանատարը, ևս դրդրում է Ադրբեջանին հարձակվելու»,- նկատեց Ստեփան Գրիգորյանը:

Զեկույցում նաև ասվում է. «Փոխզիջման գնալու երկու կողմերի՝ Բաքվի և Երևանի ոչ պատրաստակամությունը, երկու երկրների հասարակությունների ներքին ճնշման աճը, Ադրբեջանի ռազմական կայուն արդիականացումը և Հայաստանի՝ ռուսական նոր ռազմատեխնիկայի ձեռքբերումը՝ 2018-ին լայնածավալ ռազմական գործողությունների ռիսկեր են ստեղծում»:

Ստեփան Գրիգորյանի խոսքով՝ Հայաստանն ու Ադրբեջանն այդ առումով հավասար հարթության վրա են դրվում: «Այն, որ մտավախությունը կապված է միլիտարիզացիայի հետ, համաձայն եմ: Նշանակություն չունի, որ իրենք միլիտարիզացվում են երկու անգամ ավել Հայաստանից, դժբախտաբար Հայաստանն էլ է այդ ճանապարհով գնում» ,- հավելեց քաղաքագետը:

Մանրամասները՝ տեսանյութում:

Շողիկ Գալստյան