Դատարանի որոշումից հետո Օնիկ Գասպարյանը մի քանի օր գնացել է աշխատանքի. պաշտպան․ ՏԵՍԱՆՅՈՒԹ

Դատարանի որոշումից հետո Օնիկ Գասպարյանը մի քանի օր գնացել է աշխատանքի: Այս մասին լրագրողների հետ զրույցում ասաց Օնիկ Գասպարյանի պաշտպան Արամ Օրբելյանը։

«Որոշակի տեխնիկական գործընթացներ կան, որոնք չենք կատարվում, և դրա համար Գասպարյանը չի կարողանում որպես ԳՇ պետ կատարել իր գործառույթները, և դա է պատճառը, որ մենք հաղորդում ենք ներկայացրել»,- նշեց Օրբելյանը:

Օնիկ Գասպարյանի պաշտպանները պատրաստ են հասնել մինչև ՄԻԵԴ։ «Եթե իրավունքի խախտումը չվերացվի Հայաստանում, կդիմենք ՄԻԵԴ, ես միշտ լավատես եմ ու մարդու իրավունքների խախտումների վերացումները տեսնում եմ հայկական դատական ատյանների շրջանակներում։ Այդ մի փոքր մասը, որ այստեղ չի վերանում, պետք է վերացվի Եվրոպական դատարանում», – ասաց Օնիկ Գասպարյանի պաշտպանը՝ հավելելով, որ, այնուամենայնիվ, ակնկալում է, որ Գասպարյանի իրավունքները կպաշտպանվեն հայկական դատական ու իրավապահ մամինների կողմից:

Նա նշեց, թե վարչապետը, որը գտնում է, թե կարող է դատարանի որոշումը չկատարել ու խնդրել դատարանին, որ փոխի որոշումը, պետք է ենթարկվի քաղաքական պատասխանատվության։

«Ինձ հայտնի բոլոր զարգացած երկրներում նման մոտեցումը ակնհայտորեն կբերեր քաղաքական հետևանքների, քրեադատավարական հետևանքները նույնպես պետք է վրա հասնեն, որովհետև դատարանի որոշումը չկայացնելը համարվում է հանցագործություն»,- նշեց պաշտպանը:

Հիշեցնենք, որ դատարանը մարտի 17-ին բավարարել էր ՀՀ ԶՈՒ Գլխավոր շտաբի նախկին պետ Օնիկ Գասպարյանի հայցի ապահովման միջոց կիրառելու մասին փաստաբանի միջնորդությունը, որով պահանջվել էր ճանաչել Օնիկ Գասպարյանին պաշտոնից ազատելու իրավահարաբերության բացակայությունը: Գասպարյանը մարտի 10-ին դիմել էր Վարչական դատարան` իրավունքի ուժով ընդունված հանրապետության նախագահի՝ Զինված ուժերի գլխավոր շտաբի պետ, գեներալ-գնդապետ Օնիկ Գասպարյանին պաշտոնից ազատելու վերաբերյալ հրամանագիրը, ինչը հաստատվել է 2021թ. մարտի 10-ի վարչապետի՝ Օնիկ Գասպարյանին ՀՀ ԶՈՒ գլխավոր շտաբի պետի պաշտոնից իրավունքի ուժով ազատված համարելու մասին հայտարարությամբ, առոչինչ ճանաչելու պահանջով:

Մանրամասները՝ տեսանյութում: