27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
ԲՏԱ նախարարությունում դեռ չեն պարզել՝ ո՞ւմ պատճառով է Աբու Դաբիում ձախողվել ռազմարդյունաբերական ցուցահանդեսին մասնակցությունը
Քաղաքականություն
23.03.2021 | 23:12
Շուրջ մեկ ամիս է՝ Հակոբ Արշակյանի ղեկավարած Բարձր տեխնոլոգիական արդյունաբերության նախարարությունում չեն պարզել, թե ո՞ւմ անգործության արդյունքում է, որ փետրվարի 21-25-ը Աբու Դաբիում տեղի ունեցած IDEX-2021 միջազգային ռազմաարդյունաբերական ցուցահանդեսին հայկական կողմը մասնակցում էր դատարկ տաղավարով:
Հիշեցնենք՝ IDEX-2021 միջազգային ցուցահանդեսի ժամանակ Հայաստանի տաղավարում ռազմական տեխնիկայի ցուցանմուշների փոխարեն թռուցիկներ էին: Բարձր տեխնոլոգիական արդյունաբերության նախարարությունը բարձրացված աղմուկի ֆոնին հայտարարեց, որ առաջացել են լոգիստիկ խնդիրներ, ինչի հետևանքով հայկական ռազմական տեխնիկայի ցուցանմուշները չեն հասել Աբու Դաբի։
Փետրվարի 25-ին Կառավարության նիստի ժամանակ վարչապետ Նիկոլ Փաշինյանը հայտարարեց, որ Աբու Դաբիի ցուցահանդեսի հետ կապված նշանակել է ծառայողական քննություն, մեղավորները պատասխանատվության կկանչվեն։
Բարձր տեխնոլոգիական արդյունաբերության նախարարությունից Factor.am-ին փոխանցել են, որ ծառայողական քննության համար սահմանվելու է մեկ ամիս ժամկետ: Ըստ նախարարության պատասխանի՝ վերջնաժամկետը լրանում է վաղը:
Նշենք, որ IDEX-2021 միջազգային ցուցահանդեսի ժամանակ Հայաստանի տաղավարի կառուցապատման և դիզայներական աշխատանքների կատարման նպատակով դեռևս փետրվարի 2-ին Բարձր տեխնոլոգիական արդյունաբերության նախարարությունը ծառայությունների մատուցման պայմանագիր էր կնքել «Էքսպո Գրուպ» ՍՊԸ-ի հետ: Պայմանագրի արժեքը 23 մլն դրամ է:
Նարեկ Կիրակոսյան
