Չին-ամերիկյան բանակցությունների ողջույնի խոսքի փոխանակման արարողությունը վերածվել է մեկ ժամ տևած լեզվակռվի

ԱՄՆ նոր վարչակազմի և Չինաստանի Ժողովրդական Հանրապետության ղեկավարության բարձրաստիճան ներկայացուցիչների առաջին հանդիպումը, որը միտված էր երկու երկրների միջև նոր հարաբերությունների հիմքը դնելուն, սկսվել է կոշտ մեղադրանքների հրապարակային փոխանակմամբ: Այս մասին գրում է DW-ի ռուսական ծառայությունը։

Ալյասկա նահանգի Անքորիջ քաղաքում կայացած հանդիպման ժամանակ ԱՄՆ պետքարտուղար Էնթոնի Բլինքենը Չինաստանին մեղադրել է կիբերհարձակումների, Վաշինգտոնի դաշնակիցներին տնտեսական շանտաժի, Հոնկոնգում մարդու իրավունքների ոտնահարումների և ույղուրների հետապնդումների մեջ և հայտարարել, որ «ԱՄՆ հարաբերությունները Չինաստանի հետ անհրաժեշտության դեպքում կլինեն մրցակցային` հիմնվելով համագործակցության վրա, և հարկ եղած դեպքում` նաև թշնամական»: Վերջում Բլինքենը հայտարարել է, որ Պեկինի գործողությունները սպառնում են գլոբալ կայունությանը։

Չինաստանի Կենտկոմի արտաքին գործերի հանձնաժողովի գրասենյակի ղեկավար Յան Ցզեչին Բլինքենին պատասխանել է չինարենով 15-րոպեանոց ելույթով, որում քննադատել է ԱՄՆ-ում «թուլացող ժողովրդավարությունը», փոքրամասնությունների բռնաճնշումներն ու ամերիկյան արտաքին և առևտրային քաղաքականությունը:

«Դուք չարաշահում եք, այսպես կոչված, ազգային անվտանգություն հասկացությունը, որպեսզի խոչընդոտեք բնականոն առևտրին և դրդեք որոշ երկրների հարձակվել Չինաստանի վրա», – հայտարարել է նա ՝ հիշեցնելով ԱՄՆ ոստիկանության կողմից կիրառվող բռնությունները, ռասիզմը և «աֆրոամերիկացիների իրավունքների համար մղվող Black Lives Matter» շարժումը:

Արդյունքում՝ ողջույնի խոսքի փոխանակման արարողությունը, որը սովորաբար տևում էր ընդամենը մի քանի րոպե, վերածվել է մեկ ժամ տևած լեզվակռվի: Երկու երկրների պատվիրակությունները վիճաբանության մեջ են մտել այն հարցի շուրջ, թե երբ լրագրողները պետք է լքեն դահլիճը: ԱՄՆ խոսնակը Չինաստանին մեղադրել է սահմանված կարգը խախտելու մեջ, համաձայն որի ՝ ելույթները բացելու համար ընդամենը երկու րոպե էր հատկացված:

Տաթև Ֆռանգյան