18.11.2024 | 23:35
ԵՄ-ն ծրագրում է «քաղաքական առաքելություն» ուղարկել Վրաստան. Բորել
Վրաստանի վարչապետը չի մասնակցի ընդդիմության հետ բանակցություններին
Քաղաքականություն
12.03.2021 | 22:57
Վրաստանի վարչապետ Իրակլի Ղարիբաշվիլին չի մասնակցելու ընդդիմության հետ բանակցություններին, գրում է aliq.ge-ն:
Իշխող թիմից ներգրավված են «Վրացական երազանքի» ղեկավար Իրակլի Կոբախիձեն, Խորհրդարանի ղեկավար Արչիլ Թալակվաձեն, փոխխոսնակ Կախա Կուչավան: Եվրամիության ղեկավարի հատուկ ներկայացուցիչ Կրիստիան Դենիելսոնը հանդիպում է անցկացրել երկրի նախագահ Սալոմե Զուրաբիշվիլիի հետ:
Նախագահի մամուլի ծառայությունից հայտնում են, որ Զուրաբիշվիլին ողջունել է կառավարության պատրաստակամությունը, վստահություն է հայտնել, որ շվեդ դիվանագետի այցը լինելու է արդյունավետ, իսկ նրա փորձը կօգնի երկրում ստեղծված քաղաքական ճգնաժամի հանգուցալուծմանը: Ըստ Զուրաբիշվիլիի` պրոցեսը ճիշտ ուղղությամբ է ընթանում, սակայն ելք գտնելու համար պետք է մեղմացնել հռետորաբանությունն ու տեղափոխվել բանակցությունների սեղան:
Հիշեցնենք՝ Կրիստիան Դենիելսոնը որպես բանակցությունների հատուկ միջնորդ նշանակվել է Եվրոպական խորհրդի նախագահ Շարլ Միշելի կողմից. Միշելը Թբիլիսիում էր մարտի 1-2-ը: Եվրոպացի դիվանագետը կողմերին կոչ էր արել երկու շաբաթվա ընթացքում կոմպրոմիսի գալ, գտնել քաղաքական ճգնաժամը հարթելու ուղիներ: Արևմտյան միջնորդներն արդեն մի քանի ամիս է փորձում են ազդել Վրաստանի քաղաքական իրավիճակի վրա, սակայն ճգնաժամը երկրում ավելի է խորանում:
Խորհրդարանական ընտրություններից 4 ամիս անց էլ ընդդիմության հիմնական մասը հրաժարվում է ճանաչել ընտրությունների արդյունքները և նոր քվեարկություն է պահանջում: Իշխանությունը նոր ընտրությունների հարց հրաժարվում է օրակարգ բերել, հորդորում են բանակցությունների շրջանակում կենտրոնանալ այլ հարցերի վրա:
