Քաղաքականություն
11.03.2021 | 20:13
Բրիտանական HALO Trust բարեգործական կազմակերպությունը հերքել է լուրերն այն մասին, թե պատերազմի ընթացքում կամ դրանից առաջ թուրքական ուժերին ականադաշտերի քարտեզներ է փոխանցել: «Արմենպրես»-ի փոխանցմամբ՝ այս մասին ասվում է կազմակերպության տարածած հաղորդագրությունում:
«HALO Trust-ը տեղյակ է պնդման մասին, որ ընկերությունը 2020 թվականի Ղարաբաղյան պատերազմի ընթացքում կամ դրանից առաջ թուրքական ուժերին ականադաշտերի քարտեզներ է փոխանցել։ Ավելի քան 20 տարիների ընթացքում HALO Trust-ն աշխատել է Ղարաբաղում՝ տեղի բնակչության կյանքն անվտանգ դարձնելու համար։ HALO Trust-ը կարողանում է աշխատել հակամարտության գոտիներում ամբողջ աշխարհում, քանի որ այն ապաքաղաքական և չեզոք կազմակերպություն է։ Այս պնդումը բացարձակապես սուտ է»,- ասված է հայտարարությունում։
Նշենք, որ բրիտանական HALO Trust-ի կողմից Արցախում առկա ականապատված տարածքների քարտեզները թուրքական հատուկ ծառայություններին փոխանցելու մասին հայտնել էր Արցախի նախագահի հատուկ հանձնարարություններով ներկայացուցիչ Բորիս Ավագյանը։
Factor.am-ի հետ զրույցում նա պնդեց՝ քարտեզների փոխանցման պատճառով պատերազմի ընթացքում հակառակորդը կարողացել է բարեհաջող անցնել ականապատված տարածքներով։
«Ստացված տեղեկությունները ենթակա են ստուգման։ Դրանց վրա պետք է աշխատանք կատարվի։ Պատշաճ մարմինների կողմից դրանք կստուգվեն և հետո որոշում կկայացվի»,- հավելեց նա։
Թե որ մարմիններին են դիմել ստուգման համար՝ Բորիս Ավագյանը չմանրամասնեց, իսկ հարցին՝ որքան կարող է տևել գործընթացը, պատասխանեց, որ միայն այդ մարմինները կարող են դա որոշել։
Կապ հաստատեցինք Արցախի քննչական կոմիտեի նախագահի խորհրդական Նանար Պողոսյանի հետ, որը մեզ փոխանցեց հետևյալը․ «Քննչական կոմիտեում Ձեր կողմից նշված հարցով վարույթ չի իրականացվում, որևէ ուսումնասիրություն չկա»։
Նշենք, որ բրիտանական HALO Trust ընկերությունն ԱՄՆ Միջազգային զարգացման գործակալության ֆինանսական օժանդակությամբ 2000 թվականից Արցախում ականազերծման աշխատանքներ է իրականացրել։ 2020 թվականի մարտին հայտնի դարձավ, որ Միացյալ Նահանգների կողմից HALO Trust-ի նախագծերի ֆինանսավորումն Արցախում դադարեցվում է։
Մերի Մարտիրոսյան
