19.01.2026 | 20:10
Դանիան որոշել է բաց թողնել Դավոսի ֆորումը՝ Գրենլանդիայի շուրջ իրավիճակի պատճառով
«Իմ քայլը» չի ընտրի ներկայացված թեկնածուներին․ Մակունցը՝ Վճռաբեկ դատարանի դատավորի ընտրության մասին. ՏԵՍԱՆՅՈՒԹ
Քաղաքականություն
04.03.2021 | 13:54
ԱԺում Վճռաբեկ դատարանի դատավորի ընտրության հարցի քննարկման ժամանակ «Իմ քայլը» խմբակցության ղեկավար Լիլիթ Մակունցը գործընկերներին հիշեցրեց, որ ԲԴԽ գործող նախագահը չի առաջադրվել «Իմ քայլը» խմբակցության կողմից, չի առաջադրվել խորհրդարանական ընդդիմության կողմից և չի առաջադրվել Կառավարության կողմից, որովհետև դատավորներն առաջադրվում են դատական իշխանության կողմից, և նրան ընտրում է Դատավորների ընդհանուր ժողովը:
«Վճռաբեկ դատարանի դատավորների թեկնածուներին էլ ներկայացրել է ԲԴԽ-ն: Դա է պատճառը, որ նրանց ներկայացնում էր ԲԴԽ նախագահը»,- նշեց Մակունցը:
Նրա խոսքով՝ «Իմ քայլը» խմբակցությունն այս երկու օրերին կենտրոնացել էր նոյեմբերի 15-ին ԲԴԽ նախագահի արած հայտարարությունը հանրության համար հասկանալի դարձնելու խնդրի վրա:
«Ցավոք, ԲԴԽ նախագահի պարզաբանումները ոչ միայն բավարար ու սպառիչ չէին, այլև վերահաստատեցին մեր մտահոգությունները, որ պարոն Վարդազարյանի հայտարարությունը կանխամտածված քաղաքական էր: Լինելով մի մարմնի անդամ, որն ըստ Սահմանադրության պետք է երաշխավորի դատարանների և դատավորների անկախությունը, պարոն Վարդազարյանն իր գործունեությամբ որևէ կերպ չի նպաստել և չի նպաստում դատական իշխանության անկախության և քաղաքական զսպվածության երաշխավորմանը: Ավելին՝ քաղաքականացրել և քաղաքականացնում է իշխանությունների երեք ճյուղերից ապաքաղաքական դիտարկվող դատական իշխանությունը»,- նշեց Մակունցը:
Հաշվի առնելով Վարդազարյանի գործունեության նկատմամբ խմբակցության գնահատականը և Վարդազարյանի բացահայտ անհարգալից վերաբերմունքին լեգիտիմ խորհրդարանի նկատմամբ՝ «Իմ քայլը» խմբակցությունն այսօր չի ընտրելու Վճռաբեկ դատարանի դատավորի թեկնածու՝ նշեց Մակունցը՝ ընդգծելով, որ իրենց այդ քայլը ոչ թե դիրքորոշում է թեկնածուների նկատմամբ, այլ Վարդազարյանի՝ որպես ԲԴԽ նախագահի, գործունեության և հայտարարությունների վերաբերյալ:
«Մեր այս դիրքորոշումը արտահայտվում է նաև մեկ այլ հանգամանքով: Հասել ենք նրան, որ քրեական ենթամշակույթին առնչվող անձինք միջնորդավորված կապ են հաստատում ԱԺ պատգամավորների հետ՝ ի պաշտպանություն ԲԴԽ նախագահ Ռուբեն Վարդազարյանի»,- նշեց Մակունցը:
Մանրամասները՝ տեսանյութում:
