Երբ ռազմական ղեկարությունը դուրս է գալիս քաղաքական իշխանության դեմ, դա պետության չկայացման դրսևորում է․ Ռուբեն Բաբայան․ ՏԵՍԱՆՅՈՒԹ

Factor TV-ի հարցազրույցը ռեժիսոր, Երևանի պետական տիկնիկային թատրոնի գեղարվեստական ղեկավար Ռուբեն Բաբայանի հետ

-Պարո՛ն Բաբայան, երբ երկրի ռազմական ղեկավարությունը՝ Զինված ուժերի Գլխավոր շտաբը, դուրս է գալիս քաղաքական իշխանության դեմ, դա ի՞նչ է նշանակում։ 

-Ես կարծում եմ, որ պետության չկայացման պարագայում սա շատ բնական դրսևորում է։ Սա նոր բան չի՝ 96 թվականին մենք հիշում ենք՝ այն ժամանակվա Պաշտպանության նախարարը հայտարարեց, որ եթե նույնիսկ ընդդիմությունն ստանար 100 տոկոսանոց քվե ժողովրդի կողմից, Զինված ուժերը և ուժային կառույցները թույլ չէին տա, որ նա գար իշխանության։ Մեր հետագա պատմությունում նման բազմաթիվ դեպքեր են եղել, երբ որ վարչապետը կոչ արեց շրջապատել դատարանները և այլն։ Սա չկայացած պետության վիճակն է։ Եվ երբ պետությունն իր բոլոր կառույցներով չկայացած է, նման երևույթները շատ բնական են, որովհետև այդ ժամանակ առաջնորդվում են ո՛չ թե կոնկրետ Սահմանադրությունով, օրենքով, այլ ուրիշ հարցերով։

-Ասում եք՝ չկայացած պետության պարագայում նման երևույթները բնական են, սակայն վնասակա՞ր, թե՞ օգտակար են։

-Երբ քաղաքականությունով զբաղվում են չափից ավելի շատ մարդիկ, դա վնասակար է։ Կարծում եմ՝ նաև վնասկար է այն, որ չեն լուծվում հարցերը, որ պիտի լուծում ստանային քաղաքական դաշտում։ Հանդիպում ենք նաև այդպիսի դրսևորումների։ Ես չեմ ուզում գնահատական տալ, առավել ևս՝ հեղաշրջման վերաբերյալ, որովհետև դա հեղաշրջում չի իր դասական, զինվորական իմաստով։ Դա աշխարհում հիմնականում ընդունվում է շատ բացասական։ Ես կարծում եմ, որ նման դրսևորումներ կլինեն նաև ապագայում, երբ լուրջ չզբաղվենք պետականաշինությամբ, եթե մեր բոլոր քայլերն ուղղված կլինեն այսրոպեական տրամաբանությամբ, զգացմունքային և մեղադրանքի դաշտից, այլ ոչ թե յուրաքանչյուր, այլ ոչ թե պետություն պահպանող, պետության հենարան կառույցն իր գործով զբաղվելու։ Ցավոք սրտի՝ այդպես է։

-Բանակի՝ քաղաքականացումը վտանգավո՞ր բան է։

-Գիտեք, կան օրինակներ, ասենք թե՝ Թուրքիայում բանակը համարվում էր պետության հիմք և կարողանում էր պետությունը պահել որոշակի կանոններով՝ աշխարհիկ վիճակում, և թույլ չէր տալիս, որպեսզի քաղաքական իշխանությունը դրանից շեղվեր։ Ես կարծում եմ՝ յուրաքանչյուրս ունենք քաղաքական տարբեր հայացքներ և տարբեր նախընտրելի գործիչներ, բայց սա կառույց է և դասական իմաստով իհարկե անընդունելի է, բայց մենք չենք գտնվում դասական վիճակի մեջ։ Չենք կարող հաշվի չառնել, որ չենք կայացրել նման համակարգ, որտեղ կարելի է տալ դասական գնահատականներ։

Հարցազրույցն ամբողջությամբ՝ տեսանյութում։

Ռոբերտ Անանյան