18.11.2024 | 23:35
ԵՄ-ն ծրագրում է «քաղաքական առաքելություն» ուղարկել Վրաստան. Բորել
16 ուժերն ու իշխանությունը բախումների, առճակատման են գնում․ թղթախաղ է՝ վա բանկի կանոններով․ Արմեն Բաղդասարյան. ՏԵՍԱՆՅՈՒԹ
Քաղաքականություն
23.02.2021 | 20:15
Factor.am-ի հարցազրույցը քաղաքական վերլուծաբան Արմեն Բաղդասարյանի հետ
-Պարո՛ն Բաղդասարյան, ընդդիմադիր 16 ուժերն ապստամբության են պատրաստվում՝ շենքեր գրավելու, զոռով իշխանություն վերցնելու տեսքով։ Դա հայտարարել է Վազգեն Մանուկյանը, ընդդիմադիր այլ գործիչներ ևս։ Այսօր էլ բողոքի ակցիաներ էին կառավարական շենքերի մոտ։ Դեպի ո՞ւր է գնում քաղաքական պայքարը։
-Եթե այսպես շարունակվի, ապա իսկապես՝ գնում ենք ներքաղաքական լարվածության, ներքաղաքական բախումների։ Ընդ որում՝ այդ սրացումները երկկողմանի են։ Ես տեսնում եմ՝ և՛ իշխանությունը, և՛ 16-ի ֆորմատը կտրականապես դեմ են սահմանադրական ճանապարհով իշխանափոխությանը, այսինքն՝ արտահերթ ընտրություններին, և գնում են առճակատման։ Այնպիսի տպավորություն է՝ թղթախաղի սեղանի շուրջ խաղադրույքներ են բարձրացնում։
-Ձեր մեկնաբանմամբ՝ քաղաքական թղթախաղ է՝ վա բանկի՞ կանոններով։
-Այո՛, այդպիսի տպավորություն է ստեղծվում, որովհետև մենք մի կողմից տեսանք՝ փետրվարի 20-ի բավականին լուրջ հանրահավաքը ցույց տվեց, որ, այնուամենայնիվ, հասարակության մեջ արտահերթ ընտրությունների պահանջարկ կա։ Մյուս կողմից՝ Հայաստանն այնպիսի վիճակում է, որ չի կարող իրեն թույլ տալ ներքաղաքական բախումներ, սրացումներ կամ Վազգեն Մանուկյանի ասած՝ կայծակնային ապստամբություն։ Հետևաբար, միակ ողջամիտ լուծումը պետք է լիներ արտահերթ ընտրությունների անցկացումը։
-Ո՞վ է իրականում տորպեդահարում արտահերթ ընտրությունների գաղափարը․ իշխանությունը մեղադրում է ընդդիմությանը և հակառակը։
-Ընդ որում՝ ես տորպեդահարելու տրամաբանությունը չեմ հասկանում, համենայնդեպս, իշխանությունների կողմից, որովհետև նրանք մի կողմից ասում են, որ դեռևս բավականաչափ լայն հանրային աջակցություն ունեն, սոցիոլոգիական թվեր են ներկայացնում, որ Նիկոլ Փաշինյանն ամենաբարձր ռեյտինգ ունեցող գործիչն է և այլն։ Այդ դեպքում անհասկանալի է՝ ինչո՞ւ են նրանք սրացումների գնում, առավել ևս՝ յուրաքանչյուր օր իշխանությունները հերթական սխալներն են անում և ամեն օր նրանց վարկանիշն ավելի ցածր է լինում, քան նախորդ օրը։ Ես դրա պատճառը չեմ հասկանում։
-Անկախ Հայաստանը քաղաքական բազմաթիվ ցնցումներ է տեսել, որոնց բախումնային ավարտը ողբերգական է եղել։ Ի՞նչն է խանգարում քաղաքական ուժերին նստել, երկխոսել, արդյո՞ք դա միայն քաղաքական հպարտությունն է։
-Երկու կողմն էլ ասում է, որ երկխոսելու բան չկա։ Եվ տեսեք, իրականում էնպես չի, որ քաղաքական դաշտում միայն այդ երկու բևեռներն են՝ միայն Նիկոլ Փաշինյանը և «16»-ի ֆորմատը։ Ես չեմ կարծում՝ «16»-ի ֆորմատը կգնա կայծակնային ապստամբության կամ այդպիսի փորձ կանեն։
-Բայց հայտարարում են, որ կայծակնային ապստամբության մտադրություն ունեն։
-Դե մինչև դա էլ տարբեր բաներ էին հայտարարում, բայց չեն անում։ Իմ կարծիքով՝ նրանք թղթախաղի կանոններով փորձում են սրել իրավիճակը և իշխանություններին ստիպել՝ գնալ արտահերթ ընտրությունների։
Հարցազրույցն ամբողջությամբ՝ տեսանյութում։
Ռոբերտ Անանյան
