Մարզպետարանի կողմից դասական հովանավորչություն է. Սոֆյա Հովսեփյանը՝ Գյումրու դպրոցի տնօրենի հարցի մասին. ՏԵՍԱՆՅՈՒԹ

Մարզպետարանի աշխատողի քրոջն առավելություն տալը մարզպետարանի կողմից ներկայացված ներկայացուցիչների կողմից դասական հովանավորչության մասին է խոսում: Այս մասին ԱԺ-ում լրագրողների հետ զրույցում ասաց ԱԺ պատգամավոր Սոֆյա Հովսեփյանը՝ անդրադառնալով Գյումրիի թիվ 25 հիմնական դպրոցում տնօրենի հաստիքի համար անցկացված մրցույթին:

Անդրադառնալով հարցին, թե ոչինչ չի՞ փոխվել և ամեն ինչ ծանոթ-բարեկամով է և քաղաքականացվա՞ծ, պատգամավորն ասաց. «Ես չեմ ասի, որ ոչինչ չի փոխվել, այլ կասեմ՝ երբեմն բախտներս բերում է, բայց այդ երբեմնը շատ քիչ է լինում: Ես կարծում եմ, որ մարդիկ պետք է իրենց իրավունքն իրացնեն և պահանջեն համապատասխան բացատրություն: Ես կարծում եմ՝ ոչ թե քաղաքական կամքի բացակայությունն էր խնդիրը, այլ ի սկզբանե խոսվեց այն մասին, որ պետք է տնօրենների ընտրության կարգը փոխվի, բայց կարծես կրթության նախարարությունը հապաղում է, մի կարգ էին մշակել, որը կարծես թե չբավարարեց ուսուցիչներին ու մեկ այլ տարբերակ են փնտրում»,- նշեց Հովսեփյանը:

Նրա խոսքով՝ անգամ դեպքեր են լինում, երբ երկու-երեք քրգործով, յուրացումների գործով գնացող տնօրենը վերընտրվում է և նախարարությունը ոչինչ անել չի կարող:

Անդրադառնալով Աբովյանի թիվ 1 ավագ դպրոցի տնօրենի շուրջ բարձրացված աղմուկին՝ Սոֆյա Հովսեփյանն ասաց, թե անհասկանալի է ձայների առավելությունը: «Շահարկում են այնպես, որ հասնի փոխվարչապետին և հետո արդեն նշանակումը անեն՝ կա՛մ ըստ քաղաքականության, կա՛մ ըստ ցանկության, կա՛մ առանց տրամաբանության»,- ասաց պատգամավորը:

Մանրամասները՝ տեսանյութում։