24.04.2026 | 23:32
Կապանում ջրանջատում կլինի
Մեր դիրքորոշումներում փոփոխություն չկա. Գարեգին Բ-ն շարունակում է Փաշինյանի հրաժարականը պահանջել. ՏԵՍԱՆՅՈՒԹ
Քաղաքականություն
28.01.2021 | 10:42
Երբեք երկիրն այսպիսի ծանր իրավիճակում չի եղել, հայրենիքի նման կորուստ չենք ունեցել, երկիրը երբեք նման վտանգների առջև կանգնած չի եղել։ Այս մասին այսօր՝ հունվարի 28-ին, «Եռաբլուր» զինվորական պանթեոնում լրագրողների հետ զրույցում ասաց Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը։
«Անորոշությունը վաղվա օրվա նկատմամբ անհանգստացնող այսպես չի եղել մեր ժողովրդի համար։ Այս կացության մեջ եկեղեցին, բնական է, իր առաքելության մեջ պիտի գտնվեր և իր խոսքը պիտի ասեր, իր խոսքը՝ զգաստացնող, պատգամի կերպով բերող»,- նշեց Վեհափառը:
Հարցին, թե արդյոք նա շարունակում է պահանջել վարչապետ Նիկոլ Փաշինյանի հրաժարականը, Վեհափառն Ամենայն Հայոց Կաթողիկոսը պատասխանեց «Մեր համոզումներում, դիրքորոշումներում որևէ փոփոխություն չկա»։
Եկեղեցին պառակտող քայլեր չի՞ ձեռնարկում՝ լինելով որևէ քաղաքական ուժի դիրքորոշման կողքին, ի պատասխան այ հարցի՝ Գարեգին Բ Կաթողիկոսն ասաց. «Եկեղեցին առաջնորդվում է ազգային և պետական շահերից։ Եկեղեցու դիրքորոշումը եթե համահունչ է այս կամ այն խմբակի, քաղաքական ուժի հայացքներին, դա չպետք է մեկնաբանվի որպես կողմնակցություն եկեղեցու այս կամ այն քաղաքական կուսակցության։ Եկեղեցին վերքաղաքական հաստատություն է»։
Անդրադառնալով դիտարկմանը, որ Նիկոլ Փաշինյանի հրաժարականի պահանջով իր հայտարարությունից հետո քաղաքացիները դուրս չեկան փողոց և չպահանջեցին նրա հրաժարականը, կաթողիկոսն արձագանքեց. «Մենք հորդոր և կոչ չենք ուղղել, որ ժողովուրդը դուրս գա փողոց և համապատասխան գործողություններ իրականացնի։ Մենք հորդոր ենք ուղղել ՀՀ վարչապետին։ Մեր հիմնավորումներն առկա են մեր խոսքի տեքստում»։
