Ինձ ավելի շատ որպես խմբակցության ղեկավար է դուր գալիս Մակունցը. Ալեն Սիմոնյանը՝ Մակունցի՝ դեսպան նշանակվելու մասին. ՏԵՍԱՆՅՈՒԹ

ՀՀ իշխանությունը որոշել է ԱՄՆ դեսպանի պաշտոնի համար քաղաքական նշանակում անել: Այս մասին ԱԺ-ում լրագրողների հետ զրույցում ասաց ԱԺ փոխնախագահ  Ալեն Սիմոնյանը՝ անդրադառնալով ԱՄՆ-ում ՀՀ դեսպանի պաշտոնում Լիլիթ Մակունցի թեկնածության վերաբերյալ քննարկումներին:

Անդրադառնալով դիտարկմանը, որ Մակունցը դիվանագիտական աշխատանքի փորձ չունի՝ Սիմոնյանը նշեց, որ նշանակումները լինում են քաղաքական և դիվանագիտական. «Այս փուլում իշխանությունը ճիշտ է գտնում, որ կարող է քննարկել Լիլիթ Մակունցի թեկնածությունը: Ես վստահ եմ, որ ում թեկնածությունն էլ առաջադրեինք, միևնույն է, ինչ-որ բան ասվելու էր, ինչ որ պատճառ բերվելու էր»:

«Այն մարդկանց մեծ մասը, որոնք այսօր շատ բուռն քննարկում են Մակունցի թեկնածությունը, նույնիսկ չեն կարող ասել այսօրվա դեսպանի անուն ազգանունը»,- նշեց ԱԺ փոխնախագահն ու հավելեց, որ իրենց քաղաքական ուժի շրջանակում Մակունցի թեկնածության հարցով փոքրիկ քննարկում է եղել:

«Ինձ ավելի շատ որպես ԱԺ-ում խմբակցության ղեկավար է դուր գալիս տիկին Մակունցը,ես նրա հետ աշխատել եմ նաև նախարար եղած ժամանակ, բայց ինձ ավելի շատ դուր է եկել աշխատանքը խորհրդարանում: Խորհրդարանական դիվանագիտության շրջանակներում ես տեսել եմ իր աշխատանքը: Ես տեսել եմ իր կապերը»,-ասաց ԱԺ փոխնախագահը:

Սիմոնյանը անդրադարձավ նաև ԱՄՆ գործընկերների հետ Մակունցի կապերին. «Ես տեսել եմ, որ այդտեղ կա հնարավորություն՝ ունենալու մի մարդ, որը կարողանում է «նույն դիվանագիտական, քաղաքական լեզվով» խոսել մեր գործընկերների հետ»: