Մակունցը չի հերքում՝ Փաշինյանին փոխարինելու շուրջ քննարկում է եղել. ՏԵՍԱՆՅՈՒԹ

«Ես այլ պատգամավորների հայտարարությունները թույլ տվեք չմեկնաբանեմ, իսկ մեր ներքին քննարկումների հետ կապված այն, ինչ արդյունք ունենք, ունենք այդ արդյունքը: Ես նպտակահարմար չեմ գտնում մեր խմբակցության ներքին քննարկումները այս պահին հրապարակել»- լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը՝ անդրադառնալով «Իմ քայլը» լքած պատգամավոր Սոֆյա Հովսեփյանի հայտարարությանը, թե ինքը «Իմ քայլի» ներսում առաջարկել է փոխել վարչապետին, և դրա շուրջ քննարկում է եղել:

«Մեր խմբակցությունում եղել են տարբեր քննարկումներ»,- նշեց Մակունցը՝ չհերքելով, որ եղել է Փաշինյանին փոխարինելու շուրջ քննարկում:

Ճշտող հարցին, թե որն է եղել հիմնավորումը, որ որոշվել է վարչապետին փոխելու նախաձեռնությամբ հանդես չգալ, Մակունցը պատասխանեց. «Հիմնավորումն այն է եղել, որ ՀՀ-ում իշխանությունը քաղաքացուց խլելու մեթոդով  չի կարելի առաջնորդվել: Հետևաբար արտահերթ ընտրությունների առաջարկի օրակարգը կա և ըստ այդմ կշարժվենք առաջ»:

Անդրադառնալով շրջանառվող լուրերին, որ «Իմ քայլի» պատգամավորներին սպառնալիքներով, կոմպրոմատներով ստիպում են դուրս չգալ խմբակցությունից, Մակունցն ասաց. «Դուք «Իմ քայլից» դուրս եկած բոլոր պատգամավորների հետ հարցազրույց վարել եք, որևէ պատգամավոր կաշկանդված չէ ներկայացնել այն ինչ եղել է և բնականաբար, իրենք ձեզ նման բան չեն ասել և չեն կարող ասել, քանի որ նման բան չկա: Ինչ վերաբերում է մանդատներ դնելուն կամ խմբակցությունից դուրս գալուն, նման խնդիր չկա այս պահին»:

Մանրամասները՝ տեսանյութում: