20.05.2026 | 12:30
Թրամփը հույս ունի «շատ արագ» ավարտել Իրանում հակամարտությունը
4 արծաթե և 1 բրոնզե մեդալ Մեգապոլիսների 5-րդ միջազգային առարկայական օլիմպիադայից. ԿԳՄՍՆ
Հասարակություն
29.12.2020 | 20:48
ՌԴ մայրաքաղաք Մոսկվայում տեղի է ունեցել Մեգապոլիսների 5-րդ միջազգային օլիմպիադան, որը, Covid-19 համավարակով պայմանավորված, կայացել է առցանց ձևաչափով: Օլիմպիադան անցկացվել է «Մաթեմատիկա», «Ինֆորմատիկա», «Ֆիզիկա» և «Քիմիա» առարկաներից:
Երևանի թիմը հերթական անգամ գրանցել է բարձր արդյունքներ. անհատական մրցույթում մեր դպրոցականները նվաճել են 4 արծաթե, 1 բրոնզե մեդալ, թիմային հաշվարկում արժանացել 2-րդ կարգի գավաթի, իսկ բլից-տուրում ստացել են խրախուսական գավաթ:
Երևանի թիմը ներկայացրել են Ա․ Շահինյանի անվան ֆիզիկամաթեմատիկական հատուկ դպրոցի (5 աշակերտ), «Քվանտ» վարժարանի (2 աշակերտ) և «Հերացի» ավագ դպրոցի (1 աշակերտ) սաները:
Մեգապոլիսների առցանց օլիմպիադային մասնակցել է 31 խոշոր քաղաքի 224 աշակերտ: Ա. Շահինյանի անվան ֆիզիկամաթեմատիկական դպրոցի աշակերտներ Մհեր Կարագուլյանը («Մաթեմատիկա»), Արտաշես Գյոլեցյանը («Ֆիզիկա»), Էմիլ Կոստանյանը («Ինֆորմատիկա») և «Քվանտ» վարժարանի սան Ալեքսանդր Աբելյանը («Ինֆորմատիկա») նվաճել են արծաթե մեդալ: «Քվանտ» վարժարանի աշակերտ Լեոնիդ Ասատրյանն էլ «Ինֆորմատիկա» առարկայից արժանացել է բրոնզե մեդալի:
Տեղեկացնենք, որ մինչ միջազգային ստուգատեսն օլիմպիադան, ըստ առարկաների, անցկացվել է նաև Երևանում. մաթեմատիկայի օլիմպիադան տեղի է ունեցել Հայաստանի պետական մանկավարժական համալսարանի մաթեմատիկայի, ֆիզիկայի և ինֆորմատիկայի ֆակուլտետում (ղեկավար՝ Գ․ Ասատրյան), ֆիզիկայի օլիմպիադան՝ Ա․ Շահինյանի անվան ֆիզիկամաթեմատիկական հատուկ դպրոցում (ղեկավար՝ Բ․ Կուրղինյան), ինֆորմատիկան՝ «Քվանտ» վարժարանում (ղեկավար՝ Ա․ Անդրեասյան), քիմիան՝ Երևանի պետական համալսարանի քիմիայի ֆակուլտետում (ղեկավար՝ Ա․ Դավինյան)։ Օլիմպիադայի կազմակերպումը համակարգել է Ա. Շահինյանի անվան ֆիզիկամաթեմատիկական դպրոցից ՏՏ կոորդինատոր-պատասխանատու Դավիթ Մինասյանը:
Հիշեցնենք, որ Երևանի թիմը 2019 թ.-ին նույն օլիմպիադայում արժանացել էր 4 արծաթե և 3 բրոնզե մեդալի, իսկ թիմային հաշվարկում նվաճել 3-րդ կարգի գավաթը։
Մեգապոլիսների օլիմպիադայից 2018 թվականին մեր աշակերտները վերադարձել էին 3 արծաթե, 5 բրոնզե մեդալով, իսկ թիմային հաշվարկում արժանացել 2-րդ կարգի գավաթի։
