Հերիք եղավ, բոլ եղավ, որ չենք խոսում, չի նշանակում՝ կարելի է անցնել բոլոր սահմանները․ Վլադիմիր Վարդանյան. ՏԵՍԱՆՅՈՒԹ

ՀՀ Ազգային ժողովի պետական-իրավական հարցերի մշտական հանձնաժողովի նախագահ, «Իմ քայլը» խմբակցության պատգամավոր Վլադիմիր Վարդանյանը ԱԺ արտահերթ նիստում դատապարտեց «Իմ քայլը» խմբակցության անդամ Սիսակ Գաբրիելյանի վրա հարձակումը:  «Այսօր տեղի է ունեցել ևս մեկ հարձակում ժողովրդավարության դեմ, որովհետև հարձակվել են մի խումբ պատգամավորների վրա, մասնավորապես` պարոն Սիսակ Գաբրիելյանի վրա` խուլիգանական դրդումներով, ինչը որևէ աղերս չունի ժողովրդավարության, ժողովրդավարական պայքարի ու պառլամենտարիզմի հետ»,- ասաց Վարդանյանը:

Դիմելով «Լուսավոր Հայաստան» խմբակցության պատգամավոր Տարոն Սիմոնյանին՝ Վարդանյանը նշեց. «Ցավում եմ իմ կորցրած ժամանակի համար, որովհետև տակավին երկու շաբաթ առաջ, երբ դուք ներկայացրել էիք հայտարարություն, իմ աշխատասենյակում մինչև ժամը 2-ը բառ առ բառ ուսումնասիրել ենք ձեր հայտարարությունը, համաձայնեցրել ենք բոլոր մարմինների հետ, փորձել ենք գնահատել ռիսկերը, եթե դրանից հետո դուք ասում եք՝ մենք ձեզ չենք լսում, այլևս մեր աշխատանքն ապարդյուն է: Հերիք եղավ, բոլ եղավ, որ չենք խոսում, չի նշանակում՝ կարելի է անցնել բոլոր սահմանները»:

Հիշեցնենք՝ ԱԺ-ում քննարկվում է Քաղաքացիական օրենսգրքում փոփոխություն կատարելու մասին օրինագիծը:

ԼՀԿ պատգամավոր Տարոն Սիմոնյանը, դիմելով իշխանությանը, նշել էր. «Ձեզ հետ խորհրդակցելը անպտուղ է, որովհետև ձեր քաղաքական ղեկավարը ձեզ չի լսում: Առանց մեղքի պատասխանատվության երկու տարբերակ կա` տիեզերական իրավունքում և առավել վտանգի աղբյուրի պարագայում»,- հավելեց նա:

Մանրամասները՝ տեսանյութում: