12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Արթուր Դավթյանի նման ելույթն անակնկալ էր․ Հակոբ Սերոբյանն անցնող տարվա և օլիմպիական ուղեգրի շանսերի մասին
21.12.2020 | 14:42
«Մեր տղաները շատ լավ հանդես եկան: Մեր մասնակցությունը գնահատում եմ գերազանց»:
Այս մասին ArmSport-ի հետ զրույցում ասաց սպորտային մարմնամարզության Հայաստանի հավաքականի գլխավոր մարզիչ Հակոբ Սերոբյանը՝ ամփոփելով հայ մարմնամարզիկների ելույթները Վորոնինի գավաթի խաղարկությունում:
Հիշեցնենք, որ Օլիմպիական խաղերի չեմպիոն Միխայիլ Վորոնինի գավաթի 27-րդ խաղարկությունում Եվրոպական խաղերի չեմպիոն Արթուր Դավթյանը հիանալի է հանդես եկել թե՛ բազմամարտում, թե՛ առանձին գործիքների եզրափակիչներում՝ նվաճելով 4 ոսկե և 2 բրոնզե մեդալ: Արմեն Պետրոսյանը, որը բանակից զորացրվելուց հետո առաջին միջազգային մրցաշարին էր մասնակցում, նվաճել է 1 բրոնզե մեդալ։
Առանձին գործիքների եզրափակիչներում Արթուր Դավթյանը ոսկե մեդալակիր է դարձել նժույգթափերում, հենացատկում և ազատ վարժությունում։ Հայաստանի բազմակի չեմպիոնը երկու բրոնզե մեդալ էլ նվաճել է օղակների և պտտաձողի եզրափակիչներում, իսկ Արմեն Պետրոսյանը բրոնզե մեդալակիր է դարձել զուգափայտեր վարժությունում։
«Մեր տղաները շատ լավ են մասնակցել: Սպասվածից ավելի լավ, քանի որ 2 ամիս չէինք մարզվել: Արթուր Դավթյանը գերազանց մասնակցեց՝ նվաճելով 4 ոսկի, 2 բրոնզե: Բացարձակ չեմպիոն դարձավ՝ մասնակցեց առանց թերությունների: Հպարտանում են դրանով: Արմեն Պետրոսյանը 1 տարի առաջ է ծառայությունից վերադարձել ու հետաքրքիր էր, թե ոնց պետք է մասնակցեր և իրեն արդարացրեց: Ընդհանուր առմամբ գերազանց եմ գնահատում մեր մասնակցությունը: Արթուր Դավթյանի լավ մասնակցությունն էր անակնակալ, իսկ Պետրոսյանինը հետախուզական էր և ուզում էինք տեսնել՝ ինչի էր ընդունակ: Ինչ-որ չափով վերականգնվել էր՝ հետոն ցույց կտա ընթացքը»-ասաց Սերոբյանը:
Այս տարի Եվրոպայի առաջնությունը, որը վարկանիշային էր լինելու Օլիմպիական խաղերի համար, պետք է կայանար Թուրքիայում, սակայն Հայաստանի հավաքականը հրաժարվել էր մասնակցությունից: Այնուհետև պանդեմիայի պատճառով նաև 20 երկիր հրաժարվեցին, այդ պատճառով ԵԱ-ից վարկանիշային ստատուսը հանվեց, սակայն մրցաշարն անցկացվեց: Հակոբ Սերոբյանն ակնկալում է Օլիմպիական խաղերի մեկ ուղեգիր.
«Դոհայում պետք է լիներ Աշխարհի Գավաթի վարկանիշային մրցաշարը, բայց հետաձգվեց և հավանաբար կկայանա մարտին: Ես ճիշտն ասած ունեմ մեկ ուղեգրի ակնկալիք: Աշխարհի գավաթի խաղարկությունները սկսվել են 1999 թվականից: Մենք բաց ենք թողել 2 մրցաշար, քանի որ Բաքվում էին անցկացվում և մենք, բնականաբար, չենք մասնակցել, այդ պատճառով հույս չունենք, որ կարող ենք Աշխարհի Գավաթից վարկանիշ վերցնել, քանի որ հաշվարկվում են բոլոր մրցումների արդյունքները: Այսինքն հաշվարկվում են նախորդ տարիների մասնակցությունը, և քանի որ մենք ավելի քիչ ենք մասնակցել մյուս երկրների համեմատ, այդ պատճառով մեր շանսերն ավելի քիչ են»-նշեց Սերոբյանը:
Ամփոփելով տարին՝ մարմնամարզության Հայաստանի հավաքականի գլխավոր մարզիչը նշեց.
«Մեր ազգի համար շատ վատ տարի էր և ազդեց բոլորիս վրա և ոչ՝ միայն մարզիկների: Մարզիչների վրա էլ, ամբողջ ազգի վրա էլ ազդել է: Մարզումների մասին չէինք էլ կարողանում մտածել: Բոլոր ուժեղագույն մարզիկների զորակոչի հարցն էլ կար, և մարզումները երկրորդ պլան էին մղվում և չէինք մարզվում, քանի որ ի վիճակի էլ չէինք: Դե էլ չեմ խոսում պանդեմիայի մասին»:
Վորոնինի գավաթը հայ մարմնամարզիկների համար տարվա վերջին ստուգատեսն էր: Առաջիկա մրցաշարերի ժամկետները հայտնի են, սակայն ոչինչ դեռ վերջնական չէ.
«Մարտի կեսերին տեղի կունենա Աշխարհի Գավաթի խաղարկությունը, բայց դեռ ոչինչ հստակ չէ, ուղղակի պլանավորած է: Նույնիսկ կազմակերպիչները չգիտեն, թե ինչ կլինի: Արտասահմանում էլ ուսումնամարզական հավաք ենք պլանավորել, սակայն թե երբ բաց կլինեն այդ երկրները, ոչ մեկ չի կարող ասել»,-եզրափակեց Սերոբյանը:
Երվանդ ՀԱԿՈԲՅԱՆ
