Քաղաքականություն
16.12.2020 | 21:02«Նիկոլ Փաշինյանը «հրաժարական» է տվել և ստորագրել դեռևս նոյեմբերի 9-ի լույս 10-ի գիշերը, ուղղակի չի գիտակցում, որ այդ օրվանից, այդ պահից սկսած՝ ինքն այլևս գոյություն չունի։ Նա մեր պատմության նոր էջի սև քառակուսին է և համառորեն ապրում է իր կառուցած աշխարհում։ Դա ինքնախաբեություն է»,- Factor TV-ի հետ զրույցում նման տեսակետ է հայտնում բանաստեղծ Հուսիկ Արան։
Նրա համոզմամբ՝ ժողովուրդն այսօր շոկի մեջ է, դեռ չի կարողանում հասկանալ՝ ինչ եղավ։ Բանաստեղծի բնորոշմամբ՝ բռնցքամարտի լեզվով դա կոչվում է «նոքդաուն»․ «Այն, ինչ կատարվեց մեզ հետ, ո՛չ մենք էինք տեսել մեր ամենասև երազում, ո՛չ ադրբեջանցիները՝ իրենց լավագույն երազում։ 44 օր մեզ կանոնավոր կերպով խաբեցին, հիմա էլ շարունակվում է նույնը»։
Մեր զրուցակցի կարծիքով՝ Ադրբեջանը փուլ առ փուլ զարգացնում է «տարածքներ գերիների դիմաց» ձևաչափը․ «Մինչև ե՞րբ, մինչև ու՞ր․․․ Նիկոլ Փաշինյանը մեր վերջին երեսուն տարվա ծնունդն է։ 30 տարի մեր ազգը տքնեց և Նիկոլ ծնեց, մեր ամբողջ ֆանտազիան Նիկոլն էր։ Նա եկավ, ու մենք ստացանք այն, ինչ Ադրբեջանը՝ Էլչիբեյի, Վրաստանը՝ Սահակաշվիլու օրոք։ Փաշինյանի՝ մեկ վայրկյան ավելի մնալը նշանակում է Հայաստանի վերջնական կործանում։ Այս ազգի արգանդը չի չորացել, որ չկարողանա լիդեր ծնել։ Թող անցումային շրջանն անցնի, հավատացնում եմ՝ անպայման կգտնվի արժանավոր մեկը»։
Հուսիկ Արան անդրադառնում է նաև հայ ժողովրդի համար վճռորոշ այս փուլում մտավորականության դերին․ «30 տարի մտավորականությանն արհամարհել, արժեզրկել են, ինքն էլ մեկուսացել է։ Գոնե հիմա սկսում է ակտիվանալ այդ խավը։ Մտավոր էլիտան այլևս չպետք է թույլ տա, որ պատահական մարդիկ գան իշխանության»։
Մանրամասները՝ տեսանյութում։
Աննա Բաբաջանյան
