Կոնսենսուս չկա. ԱԺ խմբակցություններն արձագանքում են Վազգեն Մանուկյանի թեկնածությանը. ՏԵՍԱՆՅՈՒԹ

Ազգային ժողովի երեք խմբակցությունները, որոնց Սահմանադրությամբ տրված է ՀՀ վարչապետ ընտրելու լիազորությունը, նոր վարչապետի թեկնածության շուրջ կոնսենսուս չունեն: Իշխող «Իմ քայլը» խմբակցությունը, որը երկու տարի առաջ վարչապետի պաշտոնում ընտրել է Նիկոլ Փաշինյանին, համամիտ չէ ընդդիմության պնդմանը, թե Փաշինյանը, որպես պարտված ղեկավար, պետք է հրաժարական տա: ԲՀԿ-ն, որը մեծությամբ խորհրդարանի երկրորդ ուժն է, Սերժ Սարգսյանի ղեկավարած ՀՀԿ-ի, Արթուր Վանեցյանի «Հայրենիքի», Դաշնակցության ու ևս մեկ տասնյակից ավելի կուսակցությունների հետ անցումային շրջանի վարչապետի պաշտոնում հակված է տեսնել ՀՀ նախկին վարչապետ Վազգեն Մանուկյանին: ԱԺ-ի երրորդ՝ «Լուսավոր Հայաստան» խմբակցությունը վարչապետի իր թեկնածուն ունի՝ կուսակցության նախագահ Էդմոն Մարուքյանը:

«Իմ քայլից» պատգամավոր Հայկ Գևորգյանը Factor TV-ի հետ զրույցում անդրադառնալով նոր վարչապետ ունենալու հավանականության մասին հարցին՝ ասաց, որ իշխանությունը ձևավորելու իրավունքը վերապահված է քաղաքացիներին:

ԲՀԿ-ից Միքայել Մելքումյանն էլ նշում է՝ վարչապետի թեկնածու առաջադրելով՝ քաղաքական ուժերը վերահաստատում են հանրության շրջանում առկա Նիկոլ Փաշինյանի հրաժարականի պահանջը:

Մելքումյանից հետաքրքրվեցինք՝ արդյո՞ք 16 կուսակցություններն անպտուղ գործընթաց չեն սկսել, քանի որ երբ գործընթացը հասնի խորհրդարան, վարչապետի ընտրությունը բախվելու է փակուղու: Բանն այն է, որ խմբակցությունները վարչապետի թեկնածու առաջադրելու հնարավորություն կունենան այն ժամանակ, երբ Նիկոլ Փաշինյանը հրաժարական ներկայացնի, իսկ խորհրդարանում գործող վարչապետին անվստահություն հայտնելու համար անհրաժեշտ է 67 պատգամավորի կողմ քվե, մինչդեռ ընդդիմադիր խմբակցությունները միասին ունեն 42 պատգամավոր: Մելքումյանը հիշեցնում է՝ 2018 թվականին ԱԺ-ն վարչապետ ընտրեց 9 հոգանոց խմբակցությունից:

Խորհրդարանական ընդդիմության օրակարգում համընկնում է միայն Նիկոլ Փաշինյանին վարչապետի պաշտոնից հեռացնելու հարցը: ԲՀԿ-ն ու ԼՀԿ-ն վարչապետի միասնական թեկնածուի շուրջ կոնսենսուս չունեն:

«Լուսավոր Հայաստանից» Կարեն Սիմոնյանն ասում է՝ երկրում ութսունից ավելի քաղաքական ուժ կա, որոնք գործում են ընդդիմադիր դաշտում: Պատգամավորը կարծում է՝ այս դեպքում ճիշտ չէ ասել, որ Վազգեն Մանուկյանը ընդդիմության միասնական թեկնածուն է, քանի որ նրա թեկնածությունն առաջարկել են միայն 16 կուսակցություններ: Կարեն Սիմոնյանը չի բացառում, որ Էդմոն Մարուքյանը նույնպես կարող է լինել մնացած կուսակցությունների համար ընդունելի թեկնածու՝ որոշակի քննարկումների արդյունքում:

Մինչ ընդդիմությունը խորհրդարանում և խորհրդարանից դուրս վարչապետի թեկնածուներ է առաջարկում և հիմնավորում, թե ինչով է պայմանավորված ընտրությունը, «Իմ քայլում» նոր վարչապետ ընտրելու անհրաժեշտություն չեն տեսնում: Իշխող խմբակցությունից Վահե Ղալումյանը կարծում է՝ պատերազմում պարտվելը բավարար հիմք չէ, որ Նիկոլ Փաշինյանը հեռանա:

Պատգամավորը նշում է նաև՝ եթե վարչապետի նոր թեկնածուի հարց առաջանա, ապա կփնտրեն իրենց խմբակցությունում:

Այնուհանդերձ, Վահե Ղալումյանից հետաքրքրվեցինք՝ եթե պետության շահի տեսանկյունից անցումային ժամանակահատվածի համար վարչապետի ընտրության հարց առաջանա, պատրա՞ստ են ընտրել Վազգեն Մանուկյանին:

Նիկոլ Փաշինյանը նոյեմբերի 9-ից հետո, երբ ստորագրեց պատերազմը դադարեցնելու մասին եռակողմ փաստաթուղթը, որով Արցախի զգալի տարածքներ անցան Ադրբեջանին, իր հրաժարականի հավանականության մասին չի խոսել: Փոխարենն առաջարկել է վեցամսյա զարգացման ճանապարհային քարտեզ:

Մանրամասները՝ տեսանյութում։

Նարեկ Կիրակոսյան