05.08.2026 | 18:00
IDBank-ը ներկայացնում է նոր Mastercard World քարտը՝ ճանապարհորդական առավելություններով և հատուկ արշավով
1998 թվականից հաստատուն քայլերով գնացել ենք դեպի այս պարտությունը․Վարդան Հարությունյան. ՏԵՍԱՆՅՈՒԹ
Քաղաքականություն
02.12.2020 | 12:56
«Իհարկե, ժողովուրդը սիրում է լսել ականջահաջո ելույթներ, պոպուլիզմը հենց դրանում էլ կայանում է, և քաղաքական գործիչներից շատերը հենց դրա վրա են դնում հույսը, որ կունենան ժողովրդականություն: Այս մասին «Ձախողումներ՝ արտաքին ու ներքին քաղաքականության ոլորտում. ինչո՞ւ է այդպես» թեմայով քննարկման ժամանակ ասաց իրավապաշտպան Վարդան Հարությունյանը: Նրա խոսքով՝ Լևոն Տեր-Պետրոսյանի հրաժարականից հետո մեր քաղաքական կյանքում գերակշռել են այսպես կոչված «ոչմիթիզականները»: «Մենք 1998 թվականից հաստատուն քայլերով գնացել ենք դեպի այս պարտությունը, մեզ պարտության է տարել մեր մաքսիմալիզմը, մեր ու մեր հարևանների միջև բալանսը հաշվարկելու անկարողությունը:
Մենք չենք կարողացել հասկանալ, որ ապրում ենք մի տարածաշրջանում որտեղ մեր հարևանը Թուրքիան և Ադրբեջանն են, և մեր խնդիրը պետք է լինի նրանց հետ մեր հարաբերությունները պարզելը: Եթե մենք մեր հարևաններին պետք է դիտարկենք որպես թշնամիներ, և պետք է ելնենք «ոչ մի թիզ հող մեր թշնամուն» դրույթից, ապա մենք մշտապես պետք է պատերազմի մեջ լինենք հարևանների հետ, որոնցից մեկը աշխարհի հզոր երկրների դասին է դասվում: Եվ այդպես մենք կգնանք հաջորդ պարտությանը:
ժամանակին Լևոն Տեր-Պետրոսյանն առաջարկել էր լուծումներ: Եվ նա, որ ասում էր, թե խաղաղությամբ պետք է լուծվեն մեր խնդիրները, պարտվել է «ոչմիթիզականներին»: Այդպիսի քաղաքականություն էին վարում Վազգեն Սարգսյանը, Ռոբերտ Քոչարյանը, Սերժ Սարգսյանը, և մենք այսօր քաղում ենք նրանց վարած քաղաքականության պտուղները, իհարկե Նիկոլ Փաշինյանն էլ իր սխալներն ունի, բայց նա, ըստ էության, նրանց վարած քաղաքականության առաջամարտիկը դարձավ, նրանց ուղղությամբ գնաց, չկարողացավ արտաքին քաղաքական վեկտորը փոխել»,- նշեց Հարությունյանը:
Մանրամասները՝ տեսանյութում:
