Կարող է լինել հողի վարակում․ ԿԽՄԿ-ն՝ ԼՂ-ում մարմինների որոնման աշխատանքների հրատապության մասին

Լեռնային Ղարաբաղի հակամարտության գոտում անհրաժեշտ է հնարավորինս շուտ սկսել մարմինների որոնման և նույնականացման ուղղությամբ աշխատանքները, այս մասին РБК-ի հետ զրույցում հայտարարել է Կարմիր Խաչի միջազգային կոմիտեի նախագահ Պետեր Մաուրերը՝ հավելելով, որ հակառակ դեպքում հնարավոր են բացասական հետեւանքներ:

Մինչ այժմ, ըստ ԿԽՄԿ նախագահի, յուրաքանչյուր կողմը գտել է զոհվածների մարմիններ միայն իր վերահսկողության տակ գտնվող տարածքներում, որոնք հեշտ է եղել հայտնաբերելը:

«Դժվարությունը հենց շփման գծում, առաջնագծում աշխատելն է, որտեղ մարտեր են եղել, ականներ կան, այնտեղ մարմիններ գտնելը շատ դժվար է»,- ասել է նա:

Մաուրերը հավելել է, որ ԿԽՄԿ-ն այս աշխատանքներն իրականացնելու համար ունի սահմանված արձանագրություններ և լավագույն փորձը՝ «աշխատանքն առավելագույն արժանապատվորեն կատարելու, աճյունները նույնականացնելու և հարազատներին հանձնելու համար»:

Ըստ Կոմիտեի ղեկավարի՝ այս աշխատանքների ձգձգման դեպքում հնարավոր են «ամենատհաճ հետևանքները»:

«Կարող է լինել հողի վարակում: Նույնականացումը կարող է դժվար լինել, եթե մարմինները չգտնվեն նախքան ձմռան սկսվելը, քանի որ հավանականություն կա, որ ձմռան ընթացքում կսկսվի դիերի քայքայում: Մենք անցյալի փորձից գիտենք, որ եթե արագ չգործենք, պարզապես կբարդացնենք հետագա քննարկումները անհայտ կորածների խնդրի շուրջ»,- հետևանքներն է թվարկել Մաուրերը:

Նշենք, որ 1992-1994 թվականների արցախյան առաջին պատերազմից հետո ԿԽՄԿ ցուցակում դեռևս 4500 անհետ կորած կա:

Հիշեցնենք՝ հոկտեմբերի 21-ին ՀՀ Շրջակա միջավայրի նախարարությունը նախազգուշացրել էր, որ Լեռնային Ղարաբաղին սպառնում է մարդասիրական և բնապահպանական աղետ:

Տաթև Ֆռանգյան