Քաղաքականություն
19.11.2020 | 15:31
Եվրամիությունում կարծում են, որ անհրաժեշտ է ԵԱՀԿ Մինսկի խմբի շրջանակներում վերսկսել Լեռնային Ղարաբաղի կարգավիճակի շուրջ քաղաքական բանակցությունները։ Այս մասին ասվում է Բրյուսելում այսօր տարածված ԵՄ արտաքին գործերի և անվտանգության քաղաքականության հարցերով գերագույն ներկայացուցիչ Ջոզեպ Բորելի հայտարարությունում:
«ԵՄ-ն կարծում է, որ անհրաժեշտ է վերսկսել ջանքերը հակամարտության բանակցային, համապարփակ ու հաստատուն կարգավորման համար, այդ թվում նաև Լեռնային Ղարաբաղի կարգավիճակի շուրջ »,- նշվում է հայտարարությունում։
Եվրամիությունը մտադիր է համակ ուշադրությամբ հետևել Լեռնային Ղարաբաղում կրակի դադարեցման մասին համաձայնագրի դրույթների կատարմանը, հատկապես հետևելու են Ռուսաստանի ու Թուրքիայի համատեղ մոնիթորինգային կենտրոնի աշխատանքներին։
Բորելը հայտարարել է, որ ԵՄ-ն կոչ է անում ղարաբաղյան հակամարտության գոտուց ամբողջությամբ ու շուտափույթ դուրս բերել բոլոր օտարերկրյա զինյալներին։
«Եվրամիությունը հորդորում է բոլոր տարածաշրջանային սուբյեկտներին ձեռնպահ մնալ ցանկացած գործողություններից ու հռետորաբանությունից, որոնք կարող են սպառնալիքի տակ դնել կրակի դադարեցումը։ ԵՄ-ն նաև տարածաշրջանից բոլոր օտարերկրյա զինյալների լիակատար ու շուտափույթ դուրսբերման կոչ է անում»,- ասվում է հայտարարությունում։
Հիշեցնենք՝ Ֆրանսիայի նախագահ Էմանուել Մակրոնը հոկտեմբերի սկզբին ԵՄ գագաթնաժողովի ժամանակ հայտարարել էր Լեռնային Ղարաբաղ Թուրքիայի կողմից սիրիացի զինյալների տեղափոխման մասին։ Դրանից հետո Բորելը կոչ էր արել Անկարային չմիջամտել հակամարտությանն ու նպաստել դրա կարգավորմանը։
Տաթև Ֆռանգյան
